Siguria për organizimin e Botërorit

FIFA ka konfirmuar se qeveria e Shteteve të Bashkuara të Amerikës ka autoritetin përfundimtar në vlerësimin dhe përcaktimin e sigurisë në qytetet pritëse të Kupës së Botës 2026. Ky qëndrim vjen pas deklaratave të presidentit amerikan, Donald Trump, i cili sugjeroi se mund të kërkojë zhvendosjen e ndeshjeve nga qytete që ai i konsideron “të rrezikshme”, raporton Klan.

Trump deklaroi se presidenti i FIFA-s, Gianni Infantino, do të zhvendoste “shumë lehtë” ndeshjet nëse ai do ta kërkonte një gjë të tillë. Ai përmendi gjithashtu mundësinë e zhvendosjes së Lojërave Olimpike 2028 nga Los Angeles, në rast se konsiderohet se qyteti nuk përmbush standardet e sigurisë.

Presidenti amerikan ka kritikuar më parë qytete si Seattle dhe San Francisco, duke i cilësuar si të pasigurta për ngjarje të mëdha sportive. Një zëdhënës i FIFA-s theksoi se “siguria dhe mbrojtja janë përparësi kryesore në të gjitha ngjarjet e FIFA-s në mbarë botën”, dhe shtoi se “këto janë përgjegjësi të qeverive përkatëse, të cilat vendosin për masat më të mira në interes të sigurisë publike”.

Ndërkohë, presidenti i FIFA-s, Gianni Infantino, ka krijuar një marrëdhënie të ngushtë me Trumpin dhe së fundmi mori pjesë në një samit për paqen në Lindjen e Mesme së bashku me të në Egjipt. Aktualisht, FIFA nuk ka identifikuar probleme të mëdha sigurie në asnjë nga 16 qytetet pritëse në SHBA, Kanada dhe Meksikë, ku do të zhvillohet Kupa e Botës 2026.