Shkupi dhe Sofja ranë dakord që tuneli në Deve Bair të ndërtohet nga një kontraktor dhe të rishqyrtohet çmimi i hekurudhës drejt Bullgarisë
Të ketë një projekt të përbashkët për të mos ndërtuar një tunel që nuk të çoj[ askund, që Bullgaria të përfundojë pjesën e saj të hekurudhës dhe të rishikojë vetë çmimin e projektit. Këto tri argumente që zëvendëskryeministri dhe ministri i Transportit Aleksandar Nikolloski i theksoi në periudhën e kaluar në lidhje me linjën hekurudhore të Maqedonisë së Veriut dhe Bullgarisë përmes Korridorit 8, u pranuan në takimin që u mbajt dje në Sofje ndërmjet delegacioneve të të dy vendeve dhe përfaqësues të Bashkimit Evropian, njoftuan sot nga Ministria e Transportit, transmeton Portalb.mk.
Në takim, siç informohet nga atje, pala maqedonase, e udhëhequr nga sekretari shtetëror në Ministrinë e Transportit, Stefan Velkovski dhe drejtori i “Hekurudha – Infrastrukturë”, Sinisha Ivanovski, ka theksuar se vendi nuk devijon nga linja hekurudhore, e cila shihet si një projekt rajonal i cili thekson zhvillimin e rrjeteve evropiane të transportit.
Në këtë drejtim dhe pas rreziqeve të vlerësuara dhe në kuadër të performancës, u konstatua se ndërtimi i tunelit nga linja hekurudhore duhet të kryhet nga një kontraktues.
Sipas Ministrisë së Transportit, në takim është pranuar edhe nga të dyja palët që faza e tretë e projektit, gjegjësisht seksioni Kriva Pallankë – Deve Bair, të rishqyrtohet nga pikëpamja e çmimit për shkak se ajo aktuale është shumë e lartë dhe e paarsyeshme dhe synimi është zvogëlimi i saj.
“Të dy delegacionet janë pajtuar që të shfrytëzohet edhe vendimi për projektin teknik për tunelin e dorëzuar nga NP ‘Hekurudha – Infrastrukturë’”, thuhet në njoftimin e Ministrisë.
Përfaqësuesit e delegacioneve ranë dakord që të dy vendet të formojnë grupe pune, qëllimi i të cilave do të jetë përgatitja e dokumentacionit të nevojshëm për tunelin.
“Gjatë takimit palët shkëmbyen informacione, një afat kohor për ndërtimin, si dhe ndanë përvojat lidhur me çështjet teknike për ndërtimin e Korridorit 8, veçanërisht në pjesën e procedurave për funksionimin e ardhshëm të tunelit ndërkufitar të Deve Bairit. Palët ranë dakord gjithashtu që marrëveshjet e arritura t’ua prezantojnë institucioneve përgjegjëse financiare të BE-së”, thuhet në njoftim.
Takimi u raportua dje edhe nga mediat bullgare, të cilat përcollën njoftimin e Ministrisë së Transporteve atje, në të cilin thuhet gjithashtu se të dyja palët kanë shkëmbyer informacione, përcaktuan një afat kohor dhe kanë ndarë përvojat e tyre për çështje teknike dhe tema që kanë të bëjnë me ndërtimi i Korridorit 8, me theks në tunelin ndërkufitar “Deve Bair”.
Edhe nga pala bullgare thonë se pjesëmarrësit e takimit janë pajtuar se është më e leverdishme që tuneli të ndërtohet nga një kontraktor, për çka kanë marrë mbështetje nga përfaqësuesit e Bankës Evropiane të Investimeve (BEI) dhe Bankës Evropian për Rindërtim dhe Zhvillim (BERZH), të cilët shprehën gatishmërinë për të ndihmuar në përgatitjen dhe zbatimin e procedurës së tenderit.
Se cila nga palët do të kryejë prokurimin publik për kontraktorin e tunelit do të vendoset në një nga takimet vijuese me institucionet financiare, theksojnë nga Ministria bullgare.
Takimi i djeshëm u dakordua më 16 tetor në Bruksel nga përfaqësuesit e Maqedonisë së Veriut dhe Bullgarisë, ku të dyja palët arritën marrëveshje për vazhdimin e përbashkët të ndërtimit të hekurudhës së Korridorit 8.
Ndryshe, ndërtimi i hekurudhës për Bullgarinë në periudhën e kaluar u vu në pikëpyetje pasi zëvendëskryeministri dhe ministri i transportit të vendit, Aleksandar Nikolloski, kundërshtoi haptazi vazhdimin e ndërtimit të seksionit të tretë (Kriva Palanka – Deve Bair), duke akuzuar Bullgarinë se nuk ka një projekt për Korridorin 8.
Deklaratat e tij, përveç Sofjes, morën reagime edhe nga i dërguari special gjerman për Ballkanin Perëndimor, Manuel Saracin, i cili shprehu shqetësimin se qeveria e re në vend ka humbur interesin për zbatimin e projektit dhe se në vend të këtij korridori, prioritet i jepet Korridorit 10 në Shkup që lidh Austrinë, Slloveninë, Kroacinë, Serbinë, Maqedoninë e Veriut dhe Greqinë.
Por, kryeministri Hristijan Mickoski më 7 tetor në konferencën e përbashkët për shtyp me kolegun e tij serb Millosh Vuçeviq, i cili ishte për vizitë zyrtare në vend, tha se Korridori 8 mbetet prioritet i Qeverisë së Maqedonisë.