Sela: Temat serioze nuk ju lihen njerëzve joserioz si Taravari që ndryshojnë qëndrimet pesë herë në ditë

By F. Xh. On 26/01/2026 12:51

Arben Taravari dhe Ziadin Sela. Foto nga Aleanca per Shqiptaret (Facebook)

Aleanca për Shqiptarët e Arben Taravarit javën e kaluar njoftoi se do ta ankimojë në Gjykatën Kushtetuese Ligjin për Kundravajtje i cili mundëson futjen në funksion të sistemit Qyteti i Sigurt. Megjithatë, Aleanca për Shqiptarët e Ziadin Selës u tregua më e shpejtë, ata dorëzuan të parët nismë të tillë në Gjykatën Kushtetuese, transmeton Portalb.mk

Sela tha se kjo është temë serioze e cila nuk duhet të lihet në dorë të njerëzve joseriozë si Taravari.

“Kjo është temë tepër serioze për t’ia lënë në dorë një njeriu joserioz një njeriu që ndryshon qëndrimet pesë herë në ditë dhe pak rëndësi ka paralajmërimi, me rëndësi është a do ta bëjë një gjë të tillë, ne jemi skeptik, ne kemi bërë iniciativën tonë ndërsa e përsëris tema serioze nuk ju lihen njerëzve serioz”, tha Sela.

Sot para dite, Aleanca për Shqiptarët e Ziadin Selës dorëzoi në Gjykatën Kushtetuese nismë kundër sistemit ‘Qyteti i Sigurt’. Sipas tyre, zbatimi është diskriminues dhe në kundërshtim me kushtetutën.

LEXO: ASh Sela dorëzoi nismë në Gjykatën Kushtetuese kundër sistemit ‘Qyteti i Sigurt’: Nuk mund të zbatohet vetëm në disa zona

Nismë të tillë pati paralajmëruar edhe Aleanca për Shqiptarët e Arben Taravarit.

LEXO: “Qyteti i Sigurt” do të dërgojë edhe fotografi, si do të paguhen gjobat?

Deputetët e Maqedonisë së Veriut më 23 janar votuan për ndryshimet në Ligjin për Kundërvajtje, me të cilin mundësohet që sistemi Qyteti i Sigurt të hyjë në fuqi nga 1 shkurti.

Gjithsej votuan 100 deputetë, 81 “për” dhe 19 “kundër“. Por votuan deputetët e VMRO–DPMNE, VLEN, ZNAM, Levica dhe deputeti i pavarur Ilir Demiri si dhe Bejxhan Iliaz. Deputetët e BDI-së, ASh Sela dhe LSDM-së ishin kundër.

Sipas partive në pushtet, ky sistem synon të rrisë sigurinë në trafik dhe deri në vitin 2030 të zvogëlojë numrin e aksidenteve. Deputetët e BDI-së dhe LSDM ishin kundër këtij ligji, duke thënë se ka shumë mangësi. Ligji u ankimua në Gjykatën Kushtetuese, dy lëndë janë formuar për të. Po ashtu, dhe qytetarët në një anketë online të Portalb.mk u shprehën të shqetësuar për mangësitë e sistemit, si dënimet e larta, keqpërdorimi i të dhënave personale dhe dilemat për zbatim selektiv.

Kamerat “Qytet i Sigurt” janë të instaluara në Shkup, Tetovë dhe Kumanovë dhe në korridoret 8 dhe 10.

LEXO: Deputetët i votuan ndryshimet, Qyteti i Sigurt do të fillojë të zbatohet nga 1 shkurti