Rreth 25 liderë pritet të mblidhen në Paris për të diskutuar mbështetjen ndaj Ukrainës, pjesëmarrëse edhe RMV

Presidenti i Ukrainës, Volodymyr Zelensky, pritet të qëndrojë në Paris të hënën dhe të martën. Franca po përgatitet të presë një takim të “Koalicionit të Vullnetit” në prag të festimeve të 14 Korrikut, Ditës Kombëtare të Francës. Të paktën 25 krerë shtetesh dhe qeverish pritet të mblidhen të hënën në Paris për të diskutuar mbështetjen ndaj Ukrainës, raporton Euronews.

Koalicioni, i krijuar në Paris dhe i bashkëdrejtuar me Mbretërinë e Bashkuar, është zgjeruar tashmë në 37 shtete, të cilat marrin pjesë në takime si fizikisht, ashtu edhe përmes videokonferencave. Dy anëtarë të rinj, Moldavia dhe Maqedonia e Veriut, do të marrin pjesë për herë të parë në takimin e së hënës.

Takimi do të mbahet në Hôtel des Invalides, ku aleatët synojnë të forcojnë unitetin dhe bashkëpunimin në mbështetje të Ukrainës. Sipas Presidencës franceze, ky angazhim u riafirmua edhe në samitin e fundit të G7 në Évian dhe në samitin e NATO-s në Ankara, ku aleatët u zotuan të dërgojnë 70 miliardë euro ndihmë ushtarake për Kievin gjatë vitit 2026.

Sipas një këshilltari të presidentit francez Emmanuel Macron, synimi është të tregohet se aleatët perëndimorë vazhdojnë ta mbështesin Ukrainën dhe se Moska nuk mund të llogarisë në një “lodhje nga lufta” të vendeve perëndimore.

Fokus te mbrojtja ajrore dhe garancitë e sigurisë

Liderët e koalicionit do të diskutojnë bashkëpunimin në fushën e mbrojtjes ajrore, përfshirë planet e saposhpallura të Shteteve të Bashkuara për prodhimin me licencë të raketave Patriot në Ukrainë. Gjithashtu do të shqyrtohet krijimi i një sistemi mbrojtës kundër raketave balistike.

Sa i përket garancive të sigurisë për Ukrainën në rast të një armëpushimi të mundshëm, Presidenca franceze njofton se planet për vendosjen e një force shumëkombëshe, e cila do të stacionohej larg vijave të frontit, janë “gati”. Megjithatë, ato mbeten të ndryshueshme, pasi përfundimi i luftimeve ende duket i largët.

Përveç pranisë së trupave në terren, këto garanci do të mbështeteshin në marrëveshje dypalëshe ligjërisht detyruese dhe në përfshirjen e Shteteve të Bashkuara në monitorimin e një armëpushimi.

Presidenti ukrainas Volodymyr Zelensky pritet të jetë në Paris gjatë ditës së hënë dhe të martë.

Parada e Ditës së Bastijës

Takimi do të zhvillohet në prag të festimeve tradicionale të Ditës së Bastijës, festa kombëtare e Francës.

Pallati Élysée ka bërë të ditur se parada e këtij viti do të përfshijë rreth 6.800 pjesëtarë të forcave të armatosura, 15 përqind më shumë ushtarë se vitin e kaluar, si dhe 30 përqind më shumë automjete dhe mjete ajrore.

Në total, rreth 500 ushtarakë nga vendet anëtare të Koalicionit të Vullnetit pritet të udhëheqin paradën.

Në paradë do të marrë pjesë edhe ekipi akrobatik i Forcave Ajrore Franceze, Patrouille de France, i shoqëruar nga dy avionë luftarakë Mirage, me bashkëpilotë ukrainas të trajnuar në Francë.

Gjithashtu do të marrin pjesë edhe avionë ushtarakë nga Gjermania, Mbretëria e Bashkuar, Kroacia, Danimarka, Spanja, Greqia, Italia, Norvegjia, Polonia dhe Suedia.