RMV, import rekord i automjeteve të reja në vitin 2023 (Infografik)
Vitin e kaluar shitja e automjeteve në Jug të Maqedonisë ka arritur rekord në sektorin e veturave të reja, kamionëve dhe autobusëve, ndërsa rritje e madhe është vërejtur edhe në importin e automjeteve të përdorura, tregojnë të dhënat e Drejtorisë doganore të RMV, shkruan Meta.mk.
Në vitin 2023, në RMV janë importuar gjithsej 47.050 automjete, nga të cilat 35.832 janë të përdorura, ndërsa 11.218 janë importuar si automjete të reja.
Krahasuar me të dhënat e viteve të kaluara, në vitin 2023 importi i automjeteve të reja arriti numrin më të madh që nga viti 2009. Kjo është kryesisht për shkak të blerjes së veturave të reja, gjithsej 9,999 vetura për vitin 2023. Gjithashtu janë importuar 1202 automjete të reja mallrash dhe 17 autobusë të rinj. Përqindja e automjeteve të sapoprodhuara të importuara në vitin 2023 ishte 23.1%.
Edhe pse ka rritje në numrin e automjeteve të reja të blera nga qytetarët e Maqedonisë së Veriut, kryesisht ka dominuar blerja e automjeteve të përdorura. 76.9% e të gjitha automjeteve të importuara në vitin 2023 ishin automjete të vjetra, të cilat më parë ishin përdorur në vendet e huaja. Gjithashtu, vitin e kaluar në Jug të Maqedonisë janë importuar 33.213 vetura të përdorura, 2.355 mjete të rënda motorike dhe 264 autobusë.
Raporti më pozitiv në importin e automjeteve është për kamionët, ku përqindja e kamionëve të importuar të sapoprodhuar është më e larta. Përkundrejt kësaj, situata më e rëndë është me flotën e autobusëve, ku vitin e kaluar janë importuar vetëm 17 autobusë të rinj dhe 264 të përdorur.
Ndryshe, të dhënat për importin e veturave nga Drejtoria doganore tregojnë se numri i veturave, kamionëve dhe autobusëve është rritur dukshëm vitin e kaluar krahasuar me vitin 2022. Nga ana tjetër, interesimi për blerjen e automjeteve tek qytetarët e Maqedonisë vjen në kohën kur pushteti qendror në vend nuk ka ndërmend të ashpërsojë masat për importin e automjeteve të përdorura, gjegjësisht të ndalojë importin e atyre automjeteve që kanë qenë të prodhuara para vitit 2009 dhe nuk i plotësojnë standardet EURO 5.
Sa i përket rajonit, nga 1 janari i këtij viti, Shqipëria dhe Serbia kanë ndaluar importin e automjeteve me standarde të emetimit nën EURO 5, kurse Mali i Zi njoftoi se do ta zbatojë të njëjtën. Për shkak të kësaj, ekziston rreziku që automjetet e vjetra nga vendet fqinje të përfundojnë në Jug të Maqedonisë përmes kanaleve të shitjes së dilerëve.
Ajo që miratoi Qeveria në tetor 2023 ishin ndryshimet në Dekretin për mënyrën e llogaritjes së taksës për mjetet motorike dhe shuma e parave të nevojshme për llogaritjen e taksës për mjetet motorike për shkak të nevojës për aplikimin e një metodologjie të re për llogaritjen e sasisë së gazrave nga mjetet motorike. Taksa më të larta të importit janë vendosur nga qeveria për të aplikuar për automjetet luksoze, si dhe për ato automjete të vjetra që ndotin më shumë ajrin.
Vjeshtën e kaluar, Qeveria informoi se rritja e tarifave të importit për disa prej automjeteve në vend synon mbrojtjen e mjedisit, përmbushjen e detyrimeve nga Marrëveshja e nënshkruar nga Parisi për Klimën për uljen e emetimit neto të gazeve serrë, si dhe respektimin e standardet më të fundit të BE-së.
Ndryshe, sipas të dhënave të Entit Shtetëror të Statistikave, numri i automjeteve të regjistruara në vitin 2022 ka qenë 569.871, prej të cilave mbi 483.000 janë vetura me targa të Maqedonisë së Veriut. Për më tepër, në vitin 2022, Shkupi ka tejkaluar shifrën prej 200.000 automjetesh në rrugë sipas numrit të targave të lëshuara. Të dhënat për vitin 2023 ende nuk janë publikuar nga Enti Shtetëror i Statistikave.