Qeveria e RMV-së: Po veprohet për zbardhje të plotë të rastit të dhunës në të cilën u dogj automjeti të cilin e ka përdorur zëvendëskryeministri i parë Grubi

By F. I. On 23/07/2023 11:44

Qeveria e Maqedonisë së Veriut, foto: Teuta Buçi/Portalb.mk

Siguria është prioritet i lartë në një shoqëri demokratike. Qeveria e Republikës së Maqedonisë së Veriut e dënon aktin e djegies së automjetit të cilin e ka përdorur zëvendëskryeministri i parë Artan Grubi, njjofton Portalb.

Nga Qeveria konsiderojnë se ky rast është i dhunës i cili, siç thonë, është plotësisht i papranueshëm dhe i palejueshëm në një shoqëri demokratike e cila angazhohet për vlera evropiane.

“Të gjitha institucionet kompetente, organet hetimore dhe gjyqësore, në kuadër të kompetencave të tyre po veprojnë pa vonesë, me vendosmëri dhe profesionalizëm për zbardhjen e plotë të këtij rasti në kohën më të shpejtë të mundshme”, thuhet në kumtesën nga Qeveria.

Pas publikimit të informatave në media se, vetura që është djegur mëngjesin e sotëm në Çair është vetura private e tij, ka reagur zëvendëskryeministri Artan Grubi. Nëpërmjet një shkrimi të publikuar në profilin e tij në Facebook, ai është shprehur se vetura është e një mikut të tij, të cilit edhe i ka kërkuar falje për dëmin që i është shkaktuar për shkak të Grubit, shkruan Portalb.mk.

“I kërkoj ndjesë të gjithë fqinjëve të mi në lagjen tonë për shqetësimin e madh që e përjetuan mbrëmë para ndërtesës ku jetoj, për arsye të profesionit tim. I kërkoj ndjesë edhe shokut tim dhe familjes së tij për dëmin e shkaktuar vetëm për arsye të profesionit tim. Në politikë jam për të sherbyer dhe për të lënë gjurmë me punë e me vepra, e jo që të më terrorizohet familja, fqinjtë dhe shoqëria”, ka theksuar Grubi.

Më tej ai ka shtuar se, vazhdimisht merr kërcënime, duke thënë se ato nuk do të arrijnë të bëhen pengesë për punën e tij.

Ndryshe, në shkrime më të vjetra mediatike, mund të shihet Grubi i fotografuar para veturës “Audi”, e cila ngjan plotësisht me atë të incizimeve.

Në vitin 2020 u publikua fotografi në të cilën Grubi shihet para veturës “Audi”, pasi u sulmu para Kuvendit, përkatësisht pasi një grua 38 vjeçare e gjuajti me gur dritaren e veturës dhe e theu, pas çka u arrestua nga policia.

Ndërkaq, në vitin 2021, mediat publikuan incizime nga e njëjta veturë, me të cilën po ashtu pretendohej se është e Grubit, për atë se si ka vendosur “flasherë” të policisë në veturën e tij private, që është e ndaluar me ligj, ndërsa për të njëjtën, siç pretendohej në media, nuk ka reaguar ministri i Brendshëm, Oliver Spasovski.

Në listën anketuese për gjendjen e tij pronësore, Grubi nuk ka paraqitur se posedon veturë “Audi”, por “Citroen Xsara” në vlerë prej 1000 euro.