Populli i Gazës ndjen “gëzim të hidhur dhe të ëmbël” para festës së Bajramit derisa sulmet izraelite vazhdojnë
Këtë vit, hija e sulmeve të vazhdueshme izraelite në Rripin e Gazës duket e madhe mbi palestinezët që po përgatiten për të festuar festën e Fitër Bajramin, raporton Anadolu.
Pavarësisht se Këshilli i Sigurimit i OKB-së kërkon një armëpushim të menjëhershëm dhe se Gjykata Ndërkombëtare e Drejtësisë urdhëroi Izraelin të lejojë hyrjen e ndihmave humanitare dhe masat për të parandaluar gjenocidin, gjakderdhja në Rripin e Gazës ka hedhur një hije mbi festimet e Fitër Bajramit.
Megjithatë, shumë palestinezë në Rripin e Gazës së rrethuar po përpiqen fort për të sjellë pak gëzim për familjet dhe të dashurit e tyre. Pamjet nga qyteti Rafah tregojnë përgatitjet në disa furra buke ku bëhen ushqimet tradicionale.
Aktivitete të shtuara po përjetojnë edhe tregjet e qytetit teksa banorët përgatiten për festën e nesërme.
“Pavarësisht se jemi zhvendosur nga Gaza në veri dhe jemi vendosur në jug, ne do të vazhdojmë të bëjmë ushqime për t’u sjellë gëzim fëmijëve, grave dhe familjeve tona”, tha një banor.
Por jo të gjithë banorët janë kaq optimistë.
“Ramazani këtë vit nuk është si zakonisht, po e them unë dhe secili në mënyrën e vet. Nuk ka festë, as gëzim në këtë ajër”, tha një tjetër banor.
Izraeli ka zhvilluar një ofensivë ushtarake në Gaza që nga sulmi ndërkufitar i 7 tetorit nga Hamasi kur sipas Tel Avivit u vranë afër 1.200 njerëz.
Që atëherë, nga sulmet e vazhdueshme izraelite në Rripin e Gazës janë vrarë të paktën 33.200 palestinezë dhe mbi 76 mijë të tjerë janë plagosur, përveç asaj që është shkaktuar një shkatërrim masiv, zhvendosje e popullatës dhe vuajtje.
Izraeli gjithashtu ka vendosur një bllokadë në Rripin e Gazës, duke e lënë në prag të urisë popullsinë e enklavës, veçanërisht banorët e Gazës veriore.