Peskov: Kremlini i gatshëm për t’i dhënë fund konfliktit në Ukrainë me mjete diplomatike
Zëdhënësi i Kremlinit, Dmitry Peskov ka deklaruar se Rusia po bën çdo përpjekje për të arritur paqe me Ukrainën, transmeton Portalb.mk.
Ai shtoi se që nga fillimi, janë bërë përpjekje për ta zgjidhur konflikti në mënyrë paqësore. Një marrëveshje u zhvillua në Stamboll në mars 2022.
“Pas ndërhyrjes së Britanisë së Madhe në këtë proces, gjërat u kthyen përsëri në rrugën ushtarake”, tha Peskov.
Ai theksoi se, për shkak se nuk ishte e mundur të zgjidhej konflikti paqësisht, “operacioni special ushtarak vazhdon”.
Sipas Peskov, gjithçka tani varet nga veprimet e qeverisë së Kievit.
“Qëllimi kryesor është të garantohet siguria e njerëzve që jetojnë në Ukrainën lindore dhe që janë në rrezik vdekjeprurës”, tha ai.
Koha dhe vendi i raundit të ri të negociatave nuk janë vendosur ende. Peskov tha se datat duhet të bien dakord përfundimisht.
Ai vuri në dukje se konflikti nuk është thjesht një “operacion ushtarak kundër Kievit”, por një përballje midis Rusisë dhe Perëndimit, i cili ndërhyri drejtpërdrejt në konflikt.
Lidhur me raportet që Rusia dhe SHBA kanë biseduar për kontrollin e armëve në Gjenevë më 17-18 shkurt, Peskov tha se “deri tani nuk ka asgjë për të konfirmuar”.