Për shkak protestës, në Shkup do të ketë kufizime në komunikacion
Policia e Maqedonisë së Veriut do të riorganizojë komunikacionin në qytetin e Shkupit që në orët e mëngjesit. Kufizimet janë për shkak protestës, transmeton Portalb.mk.
“Duke filluar nga ora 11:00, në organizim të Lidhjes së Sindikatave të Maqedonisë, do të mbahet protestë për 1 Majin – Ditën Ndërkombëtare të Punës”, raportoi Policia e Maqedonisë së Veriut.
Për këtë arsye, do të ketë kufizime në këto rrugë: “Mirçe Acev”, “Filipi 2-të i Maqedonisë”, “11 Tetori”, “Dimitri Çupovski”, “Vasil Gllavinov”, “VMRO” dhe “Ilinden”.
Protesta do të fillojë prej orës 11:00 nga ndërtesa e LSM-së dhe do të mbarojë para objektit të Qeverisë së RMV-së.
Kryetari i Lidhjes së Sindikatave të Maqedonisë, Sllobodan Trendafilov, ka kërkuar që punëtorët të dalin masivisht në rrugë dhe të shprehin qartë pakënaqësinë e tyre me pagat e ulëta, mbrojtjen e dobët të të drejtave të punëtorëve dhe qëndrimin injorant të institucioneve dhe punëdhënësve.
Fokusi i protestës, theksoi Trendafilov, do të jetë kërkesa për rritjen e pagës minimale në 600 euro, e cila, sipas Lidhjes së Sindikatave, është një minimum i domosdoshëm për një jetë dinjitoze.
Përndryshe shporta minimale sindikale u rrit me 979 denarë për një muaj dhe arriti në 68.797 denarë në prill. Megjithatë, për katër muajt e parë të vitit, vlera e shportës minimale sindikale u rrit me 3.305 denarë.