PE emëroi raportuesin për heqjen e vizave për serbët e Kosovës që mbajnë pasaporta të lëshuara nga Serbia
Komisioni për Punë të Brendshme në Parlamentin Evropian emëroi sot deputetin slloven Matjazh Nemec si raportues për heqjen e vizave për serbët e Kosovës, të cilët mbajnë pasaporta të lëshuara nga Serbia, transmeton VOA.
Nemec shkroi në rrjetet sociale se serbët e Kosovës “janë të vetmit në Ballkanin Perëndimor që kanë nevojë për vizë për të udhëtuar në Bashkimin Evropian”, duke nënvizuar se shpreson që kjo çështje të zgjidhet shpejtë.
‼️ Odbor EP za notranje zadeve me je uradno imenoval za poročevalca za odpravo vizumov za kosovske Srbe, ki so imetniki posebnih potnih listov, in so še edini na Zahodnem Balkanu, ki za potovanje v EU potrebujejo vizum. Upam na hitro sprejetje!
Več👉https://t.co/8nNzcBXmKZ pic.twitter.com/07GzaDyLeA
— Matjaž Nemec (@MatjaNemec) March 5, 2024
Në nëntor të vitit të kaluar Komisioni Evropian, kishte propozuar që të hiqen vizat edhe për qytetarët serbë të Kosovës që mbajnë pasaporta të lëshuara nga Serbia, me arsyetimin se do të mbeteshin të vetmit qytetarë në Evropë pa lëvizje të lirë pas heqjes së vizave për Kosovën më 1 janar të këtij viti.
Por, ky propozim është kundërshtuar nga qeveria e Kosovës e cila ka shprehur shqetësimin e saj pasi që pasaportat e lëshuara nga Serbia i konsideron të paligjshme. Sipas qeverisë, njohja e këtyre dokumenteve, do të pengojë integrimin e komunitetit serb dhe shkel edhe frymën dhe marrëveshjet e dialogut për shuarjen e këtyre strukturave të paligjshme.
Nga një janari i këtij viti Kosova u bë pjesë e regjimit të udhëtimit pa viza, e fundit nga vendet e Ballkanit Perëndimor, që nënkupton mundësi udhëtimi pa viza deri në 90 ditë, brenda gjashtë muajsh, në cilindo nga shtetet anëtare të zonës Schengen, por nuk është leje pune.