Pas pyetjeve të Metës, MASh pagoi fondet për ushqim të subvencionuar për studentët që prisnin prej muajsh
Pas tre muajsh pritje dhe vetëm një javë pasi agjencia e lajmeve Meta.mk dërgoi pyetje në Ministrinë e Arsimit dhe Shkencës (MASH), dhjetëra studentë morën mjetet për ushqimin e subvencionuar të studentëve që shteti u kishte borxh që nga muaji mars. Sistemi elektronik i aplikimeve nuk përditëson në kohën e duhur statusin e aplikimeve për të gjithë studentët, por pavarësisht kësaj, Ministria e Arsimit pretendon se sistemi ka funksionuar pa probleme. Ushqimi i subvencionuar i studentëve këtë vit la pas edhe një sërë skandalesh – protesta studentore, vonesa në pagesa, ide të parealizuara dhe studentë të dëmtuar, transmeton Portalb.mk.
Vakti i subvencionuar si “llotari” – nuk e merr kushdo që i plotëson kushtet
Nëse keni aplikuar për ushqime të subvencionuara të studentëve vitin e kaluar, ndoshta në mars, shanset janë që nuk keni marrë ende përgjigje për aplikimin tuaj elektronik. Dhe nuk jeni i vetmi. Më shumë se njëqind studentë janë aktualisht në pritje të miratimit të aplikacioneve të tyre për ushqim të subvencionuar. Ndonëse çdo muaj shpallen konkurse të reja, Ministria e Arsimit dhe Shkencës nuk u përgjigjet me kohë të gjitha aplikimeve.
Disa studentë javëve të fundit në redaksinë e Meta.mk kanë reaguar se nuk marrin ushqime të subvencionuara të studentëve, edhe pse pretendojnë se i plotësojnë të gjitha kushtet e parapara me ligj për këtë masë financiare. Për më tepër, studentët as që e dinin nëse aplikimi i tyre ishte miratuar, kështu që prej muajit të tretë ata presin ndryshimin e statusit të aplikimeve të tyre, ku sapo qëndron mesazhi “Aplikimi u dorëzua me sukses”.
Pasi u njoftuam për problemin në bashkëpunim me profilin “Studentaria” në Instagram, mësuam se numri i studentëve që ende presin përgjigje nga Ministria e Arsimit është mbi 100. Përveç aplikimeve, studentët u ankuan edhe për komunikimin e vështirë me ministrinë, ndaj thanë se nuk marrin përgjigje dhe as emailet që i dërgojnë, në raste të caktuara, nga disa herë.
Pyetjet gazetareske – nxitje për punonjësit e Ministrisë së Arsimit dhe Shkencës
Pas ankesave nga studentët, të martën e kaluar, më 13 qershor, i dërguam pyetje MASH-it për arsyen se përse Ministria e Arsimit nuk iu përgjigjet kërkesave për ushqime të subvencionuara për muaj të tërë dhe as emaileve që studentët dërguan në adresën e emailit të ministrisë. Gjithashtu pyetëm se me çfarë problemesh përballet sistemi elektronik “e-service” përmes të cilit bëhet aplikimi për ushqim.
Pyetjet e gazetarëve duket se kanë vënë alarmin në ministri.
Pyetjet i kemi dërguar rreth mesditës dhe vetëm pas dy orësh disa nga studentët që na kanë kontaktuar më herët kanë thënë se kanë marrë përgjigje nga Ministria e Arsimit për emailet që kanë dërguar më shumë se një muaj më parë.
Studentë të tjerë kanë konfirmuar se kanë marrë përgjigje në emailet e dërguara, por nga ana tjetër statusi i aplikacioneve të tyre “të dorëzuara me sukses” në “shërbimet elektronike” nuk ka ndryshuar.
Për shumicën e studentëve, ky status nuk ka ndryshuar as sot, kur më në fund morën në llogaritë e tyre i morën subvencionet e shumëpritura të vakteve. MASh-i u ka paguar mjete për tre muaj – mars, prill dhe maj në shumë prej rreth 8.200 denarë.
Studentë të tjerë konfirmuan se pas tre muajsh janë paguar.
Në ndërkohë, agjencia e lajmeve Meta.mk ka marrë përgjigje për pyetjet nga Ministria e Arsimit, por pasi i kemi dërguar për herë të dytë. Kjo ministri tha se procesi i aplikimit për ushqim të subvencionuar është zhvilluar “pa sfida”.
“Sistemi për aplikim elektronik për ushtrimin e të drejtës për ushqim të subvencionuar të studentëve funksionon pa asnjë sfidë dhe në periudhën e kaluar, sipas Ligjit për ushqimin e subvencionuar të studentëve, është hapur për aplikim në fund të çdo muaji”, thuhet në njoftimin e Ministrisë së Arsimi dhe Shkencës.
Nga aty bëjnë me dije se në konkursin e shpallur në muajin mars kanë paraqitur aplikime gjithsej 405 studentë, të cilët më parë nuk e kanë shfrytëzuar këtë të drejtë ose është ndërprerë për një arsye të caktuar.
“Prej tyre janë miratuar 212 aplikime dhe fondet do të paguhen njëherësh për muajt mars, prill dhe maj, për të cilat procedura është në vazhdim, por po komunikojmë me disa nga studentët që kanë dorëzuar llogari transaksioni të pasakta ose të mbyllura“, është përgjigjur të hënën Ministria e Arsimit, pa u treguar arsyeja pse studentët presin fondet prej tre muajsh.
Krahas kësaj, ministria “lavdërohej” se në të gjithë procesin e ndarjes së mjeteve për ushqimin e studentëve janë përfshirë edhe shoqatat studentore me të cilat Ministria e Arsimit kishte komunikim të shpeshtë.
E në anën tjetër, kryetari i Kuvendit studentor universitar i UKM-së (KSU UKM), Sllavço Temelkovski, komunikimin me Ministrinë e Arsimit e ka vlerësuar si “korrekt, por larg nivelit që duhet të jetë”.
“Në fillim, për shkak të problemeve të mëdha, komunikimi ka qenë shumë më i shpeshtë, sidomos mes avokatit të studentëve dhe KSU UKM. Komunikimin do ta vlerësonim si korrekt, por larg nivelit që duhet të ishte, sepse edhe ajo korrektësi që vjen nga Ministria e Arsimit është për shkak të disa individëve që dhanë maksimumin e tyre. Por kur është fjala për ShSS [shujtat e subvencionuara të studentëve], duhen shumë më tepër se një ose dy persona për të bërë gjithçka ashtu siç duhet”, thotë Temelkovski.
Lideri studentor i UKM-së tha se në adresë të avokatit të studentëve të këtij universiteti vazhdimisht janë pranuar ankesa lidhur me vaktin e subvencionuar.
“Por të jem i sinqertë, këto lloj problemesh dhe ankesash ishin shumë e shumë më të zakonshme disa muaj më parë kur kishte dështime serioze të sistemit në pagesë (vonesa, mos përditësimi në kohë i të dhënave të reja, etj.). Të gjitha ankesat janë dërguar dhe po dërgohen me kohë në Ministrinë e Arsimit, të gjitha për të pasur më shumë peshë”, shton Temelkovski.
Vakt i hidhur edhe këtë vit
Kjo nuk është hera e parë që Ministria e Arsimit vonohet me pagesën e mjeteve për ushqimet e subvencionuara të studentëve. Madje, që nga fillimi i vitit shkollor, kjo masë shtetërore është përballur me pengesa të shumta para se të arrijë në llogaritë e transaksioneve të studentëve.
Përkundër faktit se subvencionet është dashur të paguhen nga tetori, fondet e para studentët i morën në fund të dhjetorit, për shkak të vonesës së konkursit përmes të cilit studentët mund ta ushtrojnë këtë të drejtë. Konkursi, nga ana tjetër, u vonua për faktin se në fillim ishin paraparë një sërë ndryshimesh në kriteret që duhet të plotësojnë studentët, kështu që nëse do të miratoheshin ndryshime të tilla ligjore, mijëra studentë do të mbeteshin pa vakt të subvencionuar këtë vit.
- LEXO: Po tërhiqet propozim-ligji për ushqim të subvencionuar, studentët nesër në takim me deputetët dhe MASH-in
- LEXO: RMV, të bashkuar në marsh, një pjesë e studentëve do të përsërisin nesër kërkesat e tyre ndaj autoriteteve
- LEXO: RMV, paratë për shujtat studentore tashmë janë te studentët
- LEXO: RMV, studentët kërkojnë 140 denarë për racion të subvencionuar
Pas protestave të shkurtra studentore, marshimeve dhe takimeve me institucionet, kriteret e përcaktuara u tërhoqën dhe pagesa e subvencionimit të vakteve vazhdoi sipas të njëjtave rregulla dhe kushte si vitin e kaluar.
Nga prilli, megjithatë, shuma e subvencioneve është rritur në 140 nga 120 denarë në ditë sa ishte më parë, pasi një premtim të tillë studentët e morën nga Ministria e Arsimit gjatë takimit me ministrin Jeton Shaqiri në nëntor.
Megjithatë, ideja origjinale e vaktit të subvencionuar të studentëve mbetet e parealizuar. Zgjidhja e sistemit, shpreshet se do të fillojë të aplikohet nga fillimi i vitit të ardhshëm akademik.
Me sistemin e ri, studentët do të blejnë vakt të subvencionuar tek ofruesit e shërbimeve të regjistruara përmes kartelave digjitale në periudha të caktuara të ditës dhe muajit.
Deri atëherë, Ministria e Arsimit dhe Shkencës (MASH) duhet të zgjedhë një bankë që do të jetë bartëse e procesit të pagesës përmes së cilës do të paguhet vakti i subvencionuar i studentëve dhe që do të krijojë kartat digjitale me të cilat studentët do të mund të blini vakte nga furnizuesit e ushqimit.
“Ne luftuam së bashku me të gjithë studentët dhe publikun jo vetëm që të mos mbetet askush, por edhe për rritje të vaktit si dhe një ligj të propozuar për rritjen e vazhdueshme të tij. Sa i përket pjesës operative, pagesa shpesh vonohej, gjë që ndodhi para së gjithash për shkak të të gjitha zhvillimeve në këtë temë, por edhe për shkak të problemeve sistematike, sepse pagesa e ShSS-së varet nga shumë institucione të tjera. Mirëpo, tani do të thosha se është arritur një kontinuitet dhe shpresojmë që për vitin e ardhshëm të jenë hedhur bazat se si duhet të funksionojë kjo masë”, thotë Sllavço Temelkovski, kryetar i KSU UKM.
Nga Ministria e Arsimit thonë se çdo student që mendon se duhet të paraqesë ankesë lidhur me ushqimin e subvencionuar për çfarëdo arsye mund ta bëjë këtë në emailin zyrtar [email protected].mk ose me shkrim përmes arkivin e Ministrisë.