Nga rrëshqitja e dheut në Pakistan vdiqën 12 veta, shumica fëmijë

Një rrëshqitje dheu, e shkaktuar nga shirat monsun, goditi një shtëpi në veriperëndim të Pakistanit, duke shkaktuar vdekjen e 12 personave, transmeton Radio Evropa e Lirë.

Shumica e viktimave janë fëmijë, tha një zyrtar i ekipeve të shpëtimit.

Shërbimi i Emergjencave tha se incidenti ka ndodhur gjatë natës në provincën Khiber Paktunkva.

Sipas tij, ekipet e shpëtimit kanë arritur të nxjerrin trupat e pajetë të nëntë fëmijëve, dy grave dhe një burri.

Autoritetet kanë paralajmëruar se shirat e furishëm, që kanë nisur muajin e kaluar, mund të shkaktojnë rrëshqitje dheu dhe përmbytje në Pakistan.

Që nga 1 korriku, mbi 275 njerëz kanë vdekur në incidente të lidhura me shirat në pjesë të ndryshme të këtij vendi.