Mjekët amë në RMV ndihen të pasigurt: “Të gjithë kemi pacientë të paqëndrueshëm mendërisht”
Shoqata e mjekëve privat amë është në kërkim të ligjeve të reja që do të nënkuptonin mbrojtje më të madhe për stafin mjekësor, pas vrasjes së kolegut të tyre doktor Aco Trpkovski, i cili u gjet i vdekur me plagë me thikë në parkingun përballë poliklinikës “Hekurana” në Shkup. Ata kërkuan edhe dënime më të rrepta për autorët, transmeton Portalb.mk.
“Ne presim që autoritetet ligjzbatuese të na tregojnë se çfarë po ndodh. Ndihemi të pasigurt… Të gjithë kemi pacientë të paqëndrueshëm mendërisht, pacientë të varur, çrregullime bipolare. Duam një hapësirë dhe rajon të sigurt për të punuar”, tha kryetarja e Shoqatës së mjekëve privatë të familjes, Lilija Çolakova Dervishova.
Ajo thotë se një akt i tillë dhune nuk duhet të përsëritet dhe apelon që të mbrohet çdo punonjës shëndetësor, qoftë infermier apo kirurg.
Sipas saj, pacientët kanë mirëkuptim për revoltën e sotme të mjekëve amë që nuk punojnë nga ora 12:00 deri në orën 16:00.
Mjeku gjashtëdhjetë e shtatë vjeçar është gjetur me plagë me thikë në automjetin e tij në parkingun përballë Poliklinikës Hekurana. Sipas denoncimit në polici, mjeku është gjetur nga djemtë e tij, të cilët kanë nisur ta kërkojnë pasi nuk është kthyer nga puna në shtëpi.
Sulmi ndaj tij është kryer para spitalit privat Remedika.
Për momentin nuk dihet se kush qëndron pas vrasjes, por policia po punon për zbardhjen e rastit.
Prokurori publik ka lëshuar urdhër për obduksion, si dhe urdhër për grumbullimin dhe analizimin e të gjitha gjurmëve të gjetura në vendngjarje dhe sigurimin e pamjeve të video vëzhguese.
Po ndërmerren veprime për zbardhjen e ngjarjes.