LSDM kërkon shkarkimin e menjëhershëm të kryeparlamentarit Afrim Gashi, Levica i ka paraqitur interpelancë

By N. D. On 06/08/2024 13:40

Kryetari i Kuvendit Afrim Gashi, foto nga Parlamenti i Maqedonisë së Veriut

LSDM do ta mbështesë kryeministrin Mickoski për shkarkimin e menjëhershëm të kryetarit të Kuvendit, Afrim Gashi, pas incidentit në aeroportin e Shkupit me Presidenten e Kosovës, Vjosa Osmani, ku mori pjesë shefi i sigurimit të tij, i cili mori kallëzim penal dhe u hoq nga posti, transmeton Portalb.mk.

Zëdhënësja e LSDM-së, Kuzeska, thotë se si parti i bëjnë thirrje prokurorisë që të fillojë procedurën dhe i ka bërë thirrje kryeministrit Hristijan Mickoski që të dalë publikisht dhe të kërkojë përgjegjësi politike nga Gashi.

“Ky rast nuk mund të konsiderohet i mbyllur derisa të gjithë të përfshirët të mos mbahen përgjegjës. Institucionet janë të detyruara të nisin procedurat menjëherë. I propozojmë Mickoskit që në vend që të ofrohet të jetë përcjellës i VIP-ave në aeroportin e Shkupit, të sigurojë respektimin e të drejtës që po e nxjerr nga goja. Gashi le të përgjigjet për rastin”, tha Kuzeska.

Ajo po ashtu thotë se nuk mjafton që VMRO-DPMNE ka kërkuar përgjegjësi vetëm nga ekzekutori e jo nga porositësi dhe ka thënë se ministri Toshkovski në këtë mënyrë mbron kryeparlamentarin, në kurriz të mosndëshkimit, arbitraritetit dhe mosrespektimit të ligjeve.

Kryetari i së Majtës, Dimitar Apasiev, sot në mëngjes në një konferencë për media në Kuvend, njoftoi se grupi parlamentar i kësaj partie sot ka dorëzuar interpelancë për punën e kryetarit të Kuvendit, Afrim Gashi, për faktin se ai futi politika joparimore në Kuvend.

Ai tha se pret që interpelanca të jetë në rend dite të seancës pas pushimeve verore, gjegjësisht në fillim të shtatorit, ndërsa interpelanca bazohet në shtatë pika të cilat janë të shpjeguara në dhjetë faqe.

“Dy pikat e para i referohen shkeljes së laicitetit të shtetit me lutjen në grup në Kuvend nga Gashi dhe shkeljes së rregullave diplomatike për sigurimin e VIP-ave me incidentin në Aeroportin e Shkupit pesë ditë më parë ku ishte përfshirë shefi i sigurimit të Gashit”, tha Apasiev.

Po ashtu, si baza të tjera, Apasiev ka renditur shkeljen e përdorimit të gjuhës maqedonase, sepse Gashi, siç thotë ai, me vetëdije po e shtyp gjuhën maqedonase dhe alfabetin e saj cirilik dhe po fut dygjuhësi ilegale edhe për deputetët maqedonas, pastaj shkelje e rregullat e përdorimit të simboleve shtetërore, shkelje e parimit të papajtueshmërisë së funksioneve si dhe shkelje e dispozitave ligjore dhe etike për antinepotizmin.

Nga ana tjetër, grupi parlamentar i VMRO-DPMNE-së nuk konsideron se është i nevojshëm zëvendësimi i kryetarit të Kuvendit, nga ku thonë se përgjegjësia është lokalizuar dhe se institucionet asnjëherë më parë nuk kanë marrë masa kaq urgjente.

“Përpjekjet e LSDM-së-së, BDI-së dhe të Majtës për të fituar pikë politike në këtë temë nuk na befasojnë dhe presim përpjekje të tilla e të ngjashme për sjellje devijante nga ana e tyre në të ardhmen. Kryetari i VMRO-DPMNE-së, Hristijan Mickoski, ka dhënë një mesazh të qartë se askush nuk është mbi ligjin. VMRO-DPMNE dënon dhe do të dënojë çdo veprim jashtë ligjit dhe që prish rendin, të gjithë do të jenë të bindur se ligjet do të vlejnë njësoj për të gjithë”, thuhet në reagimin e Grupit parlamentar të VMRO-së.

Dje, i pyetur nga gazetarët nëse incidenti në Aeroportin Ndërkombëtar të Shkupit do t’i përkeqësojë marrëdhëniet mes dy vendeve, kryeministri Mickoski tha se dy incidente të ngjashme kanë ndodhur më 16 shtator dhe 9 tetor të vitit të kaluar, dhe dallimi në atë kohë dhe tani është se tani, sipas tij, ka një publik që është i informuar ndryshe nga e kaluara kur këto dy raste nuk ishin raportuar. Ndonëse nuk deshi të hyjë në detaje se çfarë ka ndodhur saktësisht vitin e kaluar, Mickoski tha se ka politikanë që duan të fitojnë pikë të vogla politike dhe të cilët do të mundohen të ndikojnë negativisht në marrëdhëniet e ndërsjella ndërmjet qeverive të dy vendeve në të ardhmen, nuk do të kenë sukses.

“Nga viti 2023 sepse kanë ndodhur dy incidente të tilla të ngjashme dhe më 16 shtator dhe 9 tetor kanë ndodhur këto incidente, kur këta politikanë që ishin në pushtet në atë kohë. Dallimi është tani që ka një publik, dhe atëherë nuk ka pasur. Sepse kjo qeveri është demokratike, transparente dhe jo si ajo e mëparshme, e cila bazohej në parimin “si deri tani”, tha Mickoski.

Incidenti që ndodhi më 1 gusht në Aeroportin Ndërkombëtar të Shkupit, ku ishte e përfshirë edhe Presidentja e Kosovës, Vjosa Osmani, ishte temë edhe e takimit që ndodhi sot (5 gusht) në Shkup ndërmjet dy kryeministrave, Albin Kurtit dhe Hristijan Mickoskit.

Në mungesë të pamjeve, raportohet që presidentja Osmani është sulmuar edhe fizikisht nga Policia e Maqedonisë së Veriut, për shkak se ajo ka refuzuar që telefoni i saj zyrtar të futet në skaner për kontroll, duke u thirrur në protokollet e përcaktuara në Konventën e Vjenës.