Kundërspin: Vetëm për shkak të Kushtetutës nuk ka negociata me BE-në dhe pyetja është pse nuk është ndryshuar

Për momentin, mund të zbulohet një spin i dyfishtë rreth rezultateve të Këshillit të BE-së, pra “ngritja” sërish e vendit për të nisur negociatat e anëtarësimit me BE-në. Opozita, e cila nuk pranoi ndryshimin e Kushtetutës, bën spin kur pretendon se arsyeja nuk ishte ajo, por korrupsioni i madh në Qeveri. Nga ana tjetër, Qeveria kur vlerëson se fajin për gjithçka e ka opozita, bën spin, sepse harron se në një proces jo gjithëpërfshirës ka marrë një vendim për të pranuar një detyrim të tillë që vendi nuk mund ta përmbushë tani, pa marrë parasysh absurditetin, gënjeshtrat dhe marketingun që bën opozita kur flet për arsyet e refuzimit të ndryshimit të Kushtetutës, transmeton Vërtetmatësi.

Shkruan: Teofil Blazhevski

Nga dy spinet, fillimisht e rishikojmë atë të opozitës, të shprehur në qëndrimin e VMRO-DPMNE-së se shkak për bllokimin nga BE-ja nuk ishte Kushtetuta, por korrupsioni:

Spin: Lidhur me deklaratën e Kovaçevskit se nuk ka hapje të kapitujve për shkak të një lloj koalicioni pro-rus, mund të konstatojmë se ai definitivisht e ka gabuar terapinë.

Nuk do të ketë hapje të kapitujve, jo për shkak të VMRO DPMNE-së, por për shkak të epidemisë së korrupsionit dhe 500 milionë dollarëve të shpenzuara për disa reforma, pas të cilave korrupsioni në vend që të zvogëlohet rritet.

Nuk ka negociata për krim të pandëshkuar, për tenderë për korridoret, nënkontraktorët e të cilëve janë firma partiake të Qeverisë, për shkak të matësit solar dhe zgjerimit të bizneseve të Kovaçevskit dhe kumbarit të tij, për shkak të milionave nga REK Manastir dhe një sërë skandale të tjera.

[Burimi: VMRO-DPMNE-Njoftim/web; data– 14.12.2023]

Kundërspin: Partia më e madhe parlamentare në opozitë, VMRO-DPMNE, për mosfillimin e negociatave me BE-në, mbajti qëndrim të prerë se është gënjeshtër se shkaku ka qenë mosndryshimi i Kushtetutës dhe se Qeveria është fajtori më i madh për shkak të korrupsionit dhe mosndëshkimit të madh në vend – një qëndrim që është spin.

Duhet pranuar që ky spin ka forma të ndryshme, ndaj nënkryetari Aleksandar Nikolovski deklaroi se jo vetëm që nuk ndihen fajtorë, përkundrazi, ai është krenar që ia dolën të pengojnë ndryshimin e Kushtetutës me urdhër të Bullgarisë (intervistë për Click Plus nga 14.12.2023), ndërsa Antonio Milloshoski në një bisedë në MTV zgjodhi formën që Qeveria është fajtore për pranimin e diçkaje që nuk mund ta japë. Por fill pas këtyre formave shpjeguese të zgjedhura, qëndrimi i përgjithshëm i të gjithëve nga VMRO-DPMNE, përfshirë qëndrimin që po rishikojmë – njoftimi i partisë – është se Kushtetuta e pandryshuar nuk është problemi thelbësor pse Maqedonia e Veriut nuk mori dritën jeshile për fillimin e negociatave me BE-në, por kjo është për shkak të korrupsionit të madh që stimulohet nga LSDM dhe BDI.

Bëhet fjalë për shtrembërim të së vërtetës, ndonëse është e vërtetë se vendi ka një problem të madh me korrupsionin dhe shtetin ligjor, gjë që vërehet qartë në raportin e fundit të Bashkimit Evropian nga fundi i vitit 2023 dhe është theksuar së fundmi nga ambasadorja amerikane Angela Ageler, kur njoftoi se Koço Angjushev është në të ashtuquajturën “lista e zezë” e Departamentit të Shtetit.

Spini konsiston në faktin se në Këshillin e fundit të BE-së, i cili përfundoi sot (15.12) në Bruksel, u konstatua shumë shkurt në lidhje me zgjerimin, se data e negociatave përmes një konference të dytë ndërqeveritare do të caktohet sapo të bëhen ndryshimet kushtetuese:

MAQEDONIA E VERIUT

Bashkimi Evropian është i gatshëm të përfundojë fazën e fillimit të negociatave të anëtarësimit me Maqedoninë e Veriut menjëherë pasi vendi të përmbushë zotimin e tij (obligimin) për të përfunduar ndryshimet kushtetuese, siç theksohet në konkluzionet e Këshillit të 18 korrikut 2022, në përputhje me procedurat e brendshme. Këshilli Evropian i bën thirrje Maqedonisë së Veriut që të përshpejtojë përfundimin e këtyre ndryshimeve (kushtetuese).

Kështu thuhet në dokumentin e konkluzioneve të lëshuar nga Këshilli Evropian, me titullin zyrtar: “Ukraina, zgjerimi dhe reformat”. 

Ka edhe konkluzione të tjera, por ato kanë ardhur nga samiti BE-Ballkani Perëndimor, si dhe konkluzionet e Këshillit për Çështjet e Përgjithshme – GAC, ku përveç Kushtetutës, krahas Kushtetutës, vihet re përfundimi me sukses i procesit të shqyrtimit, i cili zgjati më shumë se një vit, por sërish si arsye kryesore përmendet Kushtetuta.

Prandaj, citimi i gjendjes së korrupsionit si arsye për mosfillimin e negociatave me BE-në për anëtarësim është një spin nga VMRO-DPMNE.

Spin i LSDM-së (dhe BDI-së) – opozita e ka fajin për gjithçka!

Nga ana tjetër, pushteti për të gjithë dështimin ia ngarkon opozitës dhe kjo më së shumti vihet re përmes deklaratës së kryeministrit Dimitar Kovaçevski, në të cilën vërehen elemente spin:

Spin: …Kemi mundur të dalim fitimtarë, të themi me zë të lartë se po vazhdojmë me hapjen e kapitujve të të gjitha grupimeve të negociatave me BE-në dhe se po vazhdojmë rrugën tonë të integrimit europian. Por u vërtetua se i vetmi frenues i shtetit është koalicioni anti-BE, anti-NATO dhe pro-rus i VMRO DPMNE-së dhe LEVICA-s.

[Burimi: A1 ON.mk– Kovaçevski ; data– 14.12.2023]

Kundërspin: Janë të sakta pohimet e kryeministrit Kovaçevski, i cili në emër të kryeministrit, por edhe të liderit të partisë në pushtet, thotë se “mund të kishim dalë fitimtar, për të thënë qartë dhe me zë të lartë se po vazhdojmë me hapjen e kapitujve. …

Dhe është e vërtetë, se nëse VMRO-DPMNE do të kishte pranuar të votonte për ndryshimin e Kushtetutës, kushti i marrë nga vendi në Kornizën Negociative me BE-në në vitin 2022, Maqedonia e Veriut tani do të kishte rënë dakord për fillimin zyrtar të negociatave dhe hapjen e grupit të themeleve të procesit të negociatave.

Por është i vërtetë edhe pretendimi i VMRO-DPMNE-së, se me një hap të tillë të lartë të shtetit në vitin 2022 – duke rënë dakord me Kornizën Negociative, ku është vënë kusht për ndryshimin e Kushtetutës për shkak të marrëdhënieve dypalëshe me Bullgarinë – kreu i shtetit apo i Qeverisë mori një detyrim që realisht nuk mund ta përmbushin. Gjë që dëshmon gabimin e Qeverisë që vendimin e mori pa u konsultuar më gjerë me opozitën dhe publikun ekspert dhe sektorin civil apo në një proces jo gjithëpërfshirës.

Pra, në qëndrimin e Qeverisë të shprehur përmes fjalëve të kryeministrit, ka edhe një spin, duke shtrembëruar të vërtetën. Sepse është e vërtetë që Kushtetuta nuk u ndryshua për shkak të kundërshtimit të opozitës – pavarësisht nga mungesa e justifikimit, absurditeti dhe gënjeshtrat në disa nga argumentet që jep – por është gjithashtu e vërtetë që Qeveria nuk arriti të realizojë atë që ishte premtuar sepse kuadri i negociatave u pranua pa një konsensus të ndërtuar më gjerësisht. Prandaj, një pjesë të fajit për bllokadën e djeshme në Bruksel e bartë edhe Qeveria, që do të thotë se deklarata e Kovaçevskit që po e shqyrtojmë mund të vlerësohet si deklaratë me elemente spinimi.