Kaos në Gjermani: Gjykata Kushtetuese vendosi përsëritjen e zgjedhjeve të vitit 2021 në Berlin
Në Berlin, një pjesë e zgjedhjeve të pasuksesshme për parlamentin kombëtar që u zhvilluan në shtator 2021 do të duhet të përsëriten, vendosi të martën Gjykata Kushtetuese e vendit, raporton agjencia gjermane e lajmeve DPA.
Zgjedhjet do të duhet të përsëriten në 455 zona zgjedhore dhe në zonat përkatëse të votimit me postë, tha kryetarja e gjykatës kushtetuese Doris Koenig. Bëhet fjalë për një të pestën e totalit prej 2256 njësive elektorale në qytetin milionësh.
Radhët e gjata dhe fletët e votimit të pasakta ose të munguara prishën zgjedhjet e 26 shtatorit 2021 në Berlin.
Maratona e Berlinit u mbajt në të njëjtën ditë, duke shtuar kaosin dhe duke e bërë të vështirë për zyrtarët dërgimin e fletëvotimeve zëvendësuese në qendrat e votimit.
Kaosi rezultoi në rreth 1713 ankesa formale – rreth tetë herë më shumë se votat paraprake.
Një përsëritje e zgjedhjeve lokale në 2021, të mbajtura gjithashtu në të njëjtën ditë, rezultoi në ndryshim të kryetarit të bashkisë në fillim të këtij viti.
Njeriu që përfitoi më shumë nga ai votim i përsëritur, kryebashkiaku konservator i Berlinit Kai Wegner, tha se një përsëritje e urdhëruar nga gjykata të martën do të kërkonte një “përpjekje të madhe” nga zyrtarët e qytetit.
Ai tha se kishte besim të plotë te zyrtari më i lartë zgjedhor i qytetit, Stefan Brochler, duke shtuar se priste që votimi të shkonte pa probleme.
“Në një qytet funksional, zgjedhjet duhet të zhvillohen siç duhet”, tha ai.
Në marrjen e vendimit të saj të martën, gjykata më e lartë e Gjermanisë kontrolloi nëse kishte gabime zgjedhore që mund të kishin ndikuar në shpërndarjen e vendeve në parlamentin kombëtar.
Gjykata arriti në përfundimin se gabime të tilla ishin të pranishme në 31 zona më shumë seç tregonte vendimi i Bundestagut i vitit 2022. Opozita konservatore më pas i kërkoi Gjykatës Kushtetuese të rishqyrtonte zgjedhjet, duke çuar në vendimin e së martës. Data e fundit e mundshme për anulim është 11 shkurt 2024, por data nuk është caktuar përfundimisht.