Kina pajtoi Hamasin dhe Fatahun pas 17 vjetësh, u dakordua formimi një qeveri të vetme palestineze
Fraksionet palestineze, që përfshinë rivalët Hamas dhe Fatah, ranë dakord t’i japin fund ndarjeve dhe të formojnë një qeveri të unitetit kombëtar gjatë bisedimeve në Kinë që përfunduan sot. Bisedimet e pajtimit përfshinin 14 fraksione palestineze, të cilat përfundimisht nënshkruan Deklaratën e Pekinit, raporton CNN.
Përpjekjet e mëparshme të Egjiptit dhe vendeve të tjera arabe për të pajtuar Hamasin dhe Fatahun nuk kanë arritur t’i japin fund konfliktit 17-vjeçar që ka dobësuar aspiratat politike palestineze. Megjithatë, mbetet për t’u parë nëse marrëveshja e arritur do t’i mbijetojë realitetit në terren.
Takimi në Pekin u zhvillua në mes të përpjekjeve të ndërmjetësve ndërkombëtarë për të arritur një marrëveshje armëpushimi në Gaza. Zyrtari i lartë i Hamasit Hussam Badran tha se pika më e rëndësishme në deklaratë ishte formimi i një qeverie palestineze të unitetit kombëtar për të menaxhuar çështjet palestineze në Gaza dhe Bregun Perëndimor, duke përfshirë rindërtimin dhe përgatitjen e kushteve për zgjedhje.
Aktualisht, Hamasi qeveris Gazën, ndërsa Fatah është shtylla e vetëqeverisjes palestineze, i cili ka kontroll të kufizuar mbi Bregun Perëndimor të pushtuar. Të dy fraksionet u takuan për herë të parë në Pekin në prill në një përpjekje për t’i dhënë fund mosmarrëveshjes, e cila filloi pasi Hamasi e dëboi Fatahun nga Gaza pas një lufte të shkurtër në 2007.
Marrëveshja përfaqëson një sukses diplomatik për Kinën dhe ndikimin e saj në rritje në Lindjen e Mesme. Ajo ka ndërmjetësuar më parë për përmirësimin e marrëdhënieve mes Iranit dhe Arabisë Saudite.