Kallëzim penal për një polic dhe procedura disiplinore ndaj tre policëve tjerë në RMV
Departamenti i Kontrollit të Brendshëm, Hetimeve Penale dhe Standardeve Profesionale në Ministrinë e Punëve të Brendshme të Maqedonisë së Veriut ka bërë kallëzim penal kundër D.P., punonjës policie në Komisariatin e Kontrollit Kufitar dhe Kalimit Kufitar Deve Bair, për shkak të ekzistimit të shkaqeve të dyshimit për krim, “dhunë” nga neni 386 i Kodit Penal dhe kallëzim për vepër të konstatuar në bazë të Ligjit për veprat kundër rendit dhe qetësisë publike ndaj N.D., po ashtu punonjës policie në Komisariatin e Kontrollit Kufitar dhe të Kalimit Kufitar Deve Bair, transmeton Portalb.mk.
Ministria e Brendshme njoftoi se më datë 04.11.2023 në një kazino në Kumanovë, i raportuari D.P. ka sulmuar fizikisht një person të punësuar si roje në kazino dhe është sjellë në mënyrë agresive ndaj policëve të Stacionit Policor Kumanovë, të cilët po kryenin veprime zyrtare.
“N.D., i cili ndodhej së bashku me D.P., ka prishur rendin dhe qetësinë publike dhe është sjellë në mënyrë agresive ndaj sigurisë. Departamenti për Kontroll të Brendshëm, Hetime Penale dhe Standarde Profesionale ka dorëzuar propozim ndaj dy policëve për inicimin e procedurës për shkelje të rendit dhe disiplinës së punës nga neni 210 i Marrëveshjes Kolektive të Ministrisë së Punëve të Brendshme. Ndërsa për D.P. është shqiptuar masa e largimit nga vendi i punës deri në marrjen e vendimit në procedurë disiplinore”, thonë nga MPB.
Nga atje theksuan se me marrjen e masave për zbardhjen e rastit u konstatua se gjatë ndërhyrjes D.K. dhe F.M., dy policët nga Stacioni Policor Kumanovë, ndaj një personi nga sigurimi i kazinosë nuk kanë ndërmarrë të gjitha veprimet e nevojshme zyrtare dhe nuk kanë përgatitur kallëzim ndaj tij.
Ndaj tyre, Departamenti për Kontroll të Brendshëm, Hetime Kriminale dhe Standarde Profesionale ka paraqitur propozim për fillimin e procedurës për përcaktimin e përgjegjësisë disiplinore nga neni 210 i Marrëveshjes Kolektive të Ministrisë së Punëve të Brendshme.