Kallëzim penal për autorin e djeges së veturave të Ambasadës Bullgare, e pranoi fajin

By F. Xh. On 17/06/2026 11:37

Ministria e Punëve të Brendshme ka ngritur kallëzim penal kundër I.D.S i cili dyshohej se ka djegur veturat e Ambasadës Bullgare në Shkup. Ai e pranoi kryerjen e veprës, transmeton Portalb.mk.

Ministria e Brendshme informoi se lidhur me veprën penale “shkaktimi i rrezikut të përgjithshëm”, të kryer më 15.06.2026, kur ishin djegur dy automjete diplomatike në pronësi të Ambasadës së Republikës së Bullgarisë në Shkup, SPB Shkup e ka zbardhur plotësisht rastin.

“Dje (16.06.2026), Njësia e Çështjeve Kriminalistike – Qendër dhe Bit Pazar ngriti kallëzim penal me procedurë urgjente kundër I.D.S. (44) nga Shkupi, për shkak të dyshimit të bazuar se ai e ka kryer veprën penale në fjalë”, thonë nga MPB.

Gjatë hetimeve ishin siguruar provat materiale, ndër të cilat edhe incizimet e kamerave të mbikëqyrjes në disa lokacione, si dhe veshjen që i dyshuari e kishte mbajtur në çastin e kryerjes së veprës.

Në stacionin policor, i dyshuari e ka pranuar kryerjen e veprës penale.

Ai është privuar nga liria më 15 maj ndërsa një ditë më vonë, më 16 maj, me propozim të Prokurorisë është dërguar në parapurgim.

LEXO: Paraburgim për të arrestuarin rreth djegies së veturave të Ambasadës së Bullgarisë në Shkup

Në faqen zyrtare të MPB-së u publikua edhe video ku shihet autori duke djegur dy automjetet dhe më pas duke u larguar nga vendi i ngjarjes.

Incidenti ndodh në një periudhë të ndjeshme të marrëdhënieve mes Maqedonisë së Veriut dhe Bullgarisë.

Ky incident nuk është i pari i këtij lloji që ndodh ndaj Ambasadës së Bullgarisë në Shkup, pasi më 11 janar 2026 ndodhi edhe një sulm tjetër kur një person i panjohur theu xhamin e derës hyrëse të ambasadës dhe u largua nga vendi i ngjarjes, ndërsa më pas autoritetet e identifikuan dhe e arrestuan të dyshuarin, duke e trajtuar rastin si vandalizëm ndaj misionit diplomatik.