Diskriminimi i shqiptarëve vazhdon edhe në sport, çmimi ‘8 Shtatori’ këtë vit i rezervuar vetëm për maqedonasit
Këtë vit, asnjë sportistit shqiptar nuk do t’i jepet çmimi shtetëror ‘8 Shtatori’, raporton Portalb.mk.
Këshilli për ndarjen e çmimit shtetëror sot, në Sallën e Kristaltë të Kuvendit, do të ndajë çmimet për mirënjohjen më të lartë për veprën jetësore, si dhe mirënjohjet për sportistë, trajnerë dhe punonjës sportivë për arritjet në fushën e sportit për vitin 2026.
Trajço Dimkov është fituesi i sivjetshëm i çmimit për veprën jetësore, për kontributin e jashtëzakonshëm në zhvillimin e sportit, afirmimin dhe promovimin e Republikës së Maqedonisë së Veriut në plan ndërkombëtar (mundje).
Çmimet që u ndahen sportistëve, trajnerëve (përzgjedhësve) dhe punonjësve sportivë për arritjet në fushën e sportit u jepen Dimçe Angellovit, Aco Krstovit, Dejan Angellovskit dhe Angell Micеvskit.
Lidhur me këtë kanë reaguar nga BDI-ja opozitare, ata thonë se y nuk është thjesht një rezultat në një listë shpërblimesh, por se është tregues i një qasjeje që shqiptarët i përjashton nga çdo hapësirë ku shteti duhet të njohë kontributin, suksesin dhe talentin e tyre.
“ Sportistët shqiptarë kanë përfaqësuar Maqedoninë e Veriut, kanë fituar medalje, kanë ngritur flamurin e shtetit në gara ndërkombëtare dhe kanë kontribuar me vite në zhvillimin e sportit, por kur vjen momenti për t’i vlerësuar, për ta nuk ka vend në listën shtetërore”, thonë nga BDI.
Kjo nuk është hera e parë që sportistët shqiptarë përjashtohen nga dekoratat shtetërore. Vjet, asnjë sportist shqiptar nuk gjendet në mesin e 22 sportistëve të dekoruar me medalje për arritje të larta në këtë fushë nga Qeveria e Maqedonisë së Veriut dhe Ministria e Sportit. Ky trajtim ngjalli reagime nga sportistët në vend dhe partitë politike.