Boki-13 është liruar nga burgu për shkak të gjendjes së tij shëndetësore
Bojan Jovanovski është liruar për shkak të gjendjes së rëndë shëndetësore, konfirmojnë burime gjyqësore. Edhe avokati i Boki-13, Vladimir Tufegxhiq, ka konfirmuar për Meta.mk se Jovanovski është liruar. Ky është një pezullim i përkohshëm i dënimit me burg për shkak të trajtimit, jo lirim i plotë, transmeton Portalb.mk.
“Si avokat mbrojtës konfirmoj informacionin se Gjykata Themelore Penale e Shkupit ka marrë vendim për pezullimin e vuajtjes së dënimit me burg për personin e dënuar Bojan Jovanovski dhe i është dorëzuar të dënuarit. Edhe pse ky vendim është i vonuar, ai është për t’u përshëndetur, i drejtë dhe mbi të gjitha human, i marrë në bazë të dy mendimeve të njëpasnjëshme pozitive nga Prokurori Publik kompetent në të njëjtën procedurë dhe në bazë të dokumentacionit të plotë mjekësor për gjendjen shëndetësore të personit të dënuar”, tha avokati Vladimir Tufegxhiq për Meta.mk.
Boki-13 tashmë ka bërë operacion dhe i është hequr stomaku.
Ai u dënua me 9 vite burg për çështjen “Reketi” për marrjen e shpërblimit për ndikim të paligjshëm dhe pastrim parash. Për çështjen “Lidhja Ndërkombëtare” ka një vendim të shkallës së parë me 9 vite burg shtesë për Boki-13 për mashtrim dhe pastrim parash, por ky vendim nuk është i formës së prerë.
Ndryshe, Jovanovski u dënua me 9 vjet burg, ndërkaq Janeva me 7 vjet. Në “Reket” Jovanovski u dënua për veprimet e marrjes së një shpërblimi për ndikim të paligjshëm dhe pastrim parash, kurse Janeva për abuzim të pozitës zyrtare dhe autoritetit.
Në të njëjtën çështje me ta, Zoran Mileski-Kiçec gjithashtu u akuzua për marrjen e një shpërblimi për ndikim të paligjshëm, por në seancën e parë në dhjetor 2019 ai u deklarua fajtor dhe u dënua me 3 vjet burg. Nga tetori i vitit të kaluar ai e ka shërbyer atë në Burgun e Strugës.
Sipas aktakuzës, si dhe vendimit të shkallës së parë për “Reket”, pasi Prokuroria Speciale Publike hapi hetimin “Imperia” në nëntor 2018, u kërkuan para nga biznesmeni i dyshuar Orce Kamçev, në mënyrë që ai të merrte trajtim preferencial, të tilla si revokim i paraburgimit, kthim i pasaportës një dëshmitari të mbrojtur ose përfundimi i një marrëveshjeje. Prokuroria pretendoi dhe gjykata beson se është provuar, se 1.5 milion euro u arkëtuan nga Kamçev.
Nga ana tjetër, Jovanovski dhe Janeva, gjatë gjykimit hodhën poshtë akuzat e tilla, duke akuzuar se ishte një çështje e ngritur për të shpëtuar biznesmenin Kamçev. Ata e quajtën çështjen si politike.