VLEN theksoi se KSHZ-ja i konfirmoi manipulimet zgjedhore të Frontit Evropian, këta të fundit do ta ankimojnë vendimin për rivotim
Koalicioni VLEN ka reaguar në lidhje me vendimet e Komisionit Shtetëror të Zgjedhjeve për ankesat në lidhje me zgjedhjet parlamentare. Ata theksojnë se KSHZ-ja vërtetoi manipulimet e bëra nga Fronti Evropian. Ndërkaq, Fronti Evropian reagoi duke thënë se do ta ankimojnë vendimin në Gjykatën Administrative, raporton Portalb.mk.
Fatmir Sabriu theksoi se KSHZ duke vepruar në bazë të kundërshtimeve të VLEN vendosi që të hap kutitë e votimit për 7 vendvotime në zonën 6 ku në 4 prej tyre u konstatuan parregullsi.
“Në vendvotimin 2101, vendbanimi Llërcë, Komuna e Zhelinës u konstatua se në kutinë e votimit ka 1 votë më shumë në favor të Frontit Evropian sesa votues të cilët kanë shfrytëzuar të drejtën e tyre të votës, në vendvotimin 0387 vendbanimi Gostivar dhe vendvotimin 1953 vendbanimi Tetovë pati korrigjim të rezultatit zgjedhor pasi që vota të pavlefshme janë numëruar dhe llogaritur si vota të Frontit Evropian”, tha Sabriu.
Sipas tij, Fronti Evropian duke keqpërdorur mekanizmat e pushtetit ka shkelur dhe deformuar vullnetin e qytetarit, siç janë rastet e konfirmuara me vendim të KSHZ-së në Likovë dhe Llërcë si dhe duke numëruar vota të pavlefshme në llogari të Frontit dhe BDI-së.
Nga ana tjetr, Elmi Aziri nga Fronti Evropian theksoi se sapo të pranojnë vendimin për rivotim, të njëjtin do ta ankimojnë në Gjykatën Admiistrative.
“Të gjithë ishim dëshmitar që dje deri vonë në orët e mëngjesit për keqpërdorimin brutal të institucionit të Komisionit Shtetëror Zgjedhor dhe tentativës për vjedhje materiale dhe institucionale pa asnjë argument mbi mandatet e Frontit Europian në marrëveshje të VMRO-së, LSDM-së dhe VLEN-it. Në mënyrë jo të drejtë dhe me mbivotim KSHZ solli vendim për rivotim në disa vendvotime në zonën 5 dhe 6 zgjedhore, pikërisht në vendvotimin ku fitues është pala ankimuese cilët votuesit e tyre po i emërtojnë si hajdut duke e poshtëruar kështu një elektorat të tërë. Kemi alarmuar të gjitha institucionet përkatëse dhe faktorin ndërkombëtar se anëtarëve të KSHZ-së u janë dhënë urdhra partiake”, tha Aziri.
Për akuzat e BDI-së se VLEN po bashkëpunon me partitë maqedonase për të ua marrë atyre dy deputet, Sabriu theksoi se janë të pabaza dhe se VLEN ka shfrytëzuar të drejtën ligjore për të parashtruar ankesa për vendvotimet ku kanë pasur informata se ka pasur parregullsi.
Në lidhje me atë se nëse presin që të ketë ndryshim në mandatet e deputetëve nga rivotimi, Sabriu tha se kjo varret nga qytetarët.
Partitë politike kanë dorëzuar 27 ankesa për zgjedhjet parlamentare të 8 majit.
VLEN, ka dorëzuar 10, VMRO-DPMNE 8, LSDM 5 dhe E Majta 4.
Ankesat e VLEN-it janë të gjitha në Njësinë Zgjedhore numër 6, në vendvotimet në Tetovë, Gostivar, Zhelinë, Bogovinë dhe Vrapçisht. KSHZ-dje pranoi ankesën e VLEN për një vendvotim në Komunën e Zhelinës.
Ankesat e VMRO-DPMNE-së janë për vendvotimet në Ohër, Demir Hisar, Krushevë, Kërçovë, Strugë, Manastir, Dollnen dhe Resnjë. Gjithashtu dje KSHZ-ja pranoi ankesat edhe të VMRO-së, ku në tre vendvotime do të ketë rivotim.
Ankesat e LSDM-së dhe koalicionit janë për Njësinë Zgjedhore numër 5, gjegjësisht për në Strugë, Manastir dhe Kërçovë.
Ankesat e të Majtës janë për në Çair, Strugë dhe Gazi Babë
Rivotimi në këto pika mund të sjellë ndryshim në rezultatin final në ndarjen e mandateve.
Nga ana tjetër, Fronti Evropian dy here ka reaguar për këto ankesa, ata akuzojnë se partitë politike maqedonase në koordinim me koalicionin “Vlen” dëshirojnë t’ua marrin një deri në dy mandate parlamentare përmes KSHZ-së.
Zgjedhjet e njëmbëdhjeta parlamentare në RMV u mbajtën me 8 maj 2024. Sipas rezultateve, VMRO-DPMNE fitoi 58 deputetë, Fronti Evropian 19, LSDM 18, VLEN 13, E Majta 6 dhe Znam 6. Përbërja e re e Kuvendit duhet të konstituuohet më së voni 20 ditë pas zgjedhjeve.
- LEXO: Rezultatet përfundimtare të zgjedhjeve parlamentare 2024 në RMV dhe numri i deputetëve (Infografik)
- LEXO: Rezultatet përfundimtare të zgjedhjeve presidenciale 2024 në RMV (Infografik)
- LEXO: Maqedonia e Veriut mbajti zgjedhjet parlamentare dhe presidenciale, këtu i gjeni të gjitha lajmet për procesin