Scholz paralajmëroi Netanjahun: Koha për marrëveshje

Kancelari gjerman, Olaf Scholz kërkoi në një bisedë telefonike me kryeministrin izraelit, Benjamin Netanjahu arritjen e një marrëveshjeje me Hamasin. Ka ardhur koha që të finalizohet marrëveshja për lirimin e pengjeve të Hamasit dhe koha për një ndalim të luftimeve në Rripin e Gazës, tha Scholz të dielën, sipas zëdhënësit të qeverisë gjermane, Wolfgang Büchner në Berlin, transmeton DW

Shumë objektiva ushtarake në luftë kundër Hamasit janë arritur, numri i viktimave civile dhe vuajtja njerëzore në Rripin e Gazës është e jashtëzakonshme. Një fund i luftës në zonën palestineze në Detin Mesdhe “do të ishte një hap vendimtar për uljen rajonale të shkallëzimeve”, është shprehur kancelari gjerman.

Qeveria gjermane dënon nga ana tjetër kërcënimet që vijnë nga Irani, Hizbollahu dhe të tjerë ndaj sigurisë së Izraelit dhe qytetareve e qytetarëve të tij. Sipas zëdhënësit të qeverisë gjermane, Scholz ka shprehur shqetësim të thellë për rrezikun e një shpërthimi rajonal të konfliktit. Më shumë se kurrë tani është momenti për t’u angazhuar për ndërprerjen “e spirales destruktive të hakmarrjes, uljen e tensioneve dhe angazhim konstruktiv për çshkallëzim.”

Ashpërsim i mëtejshëm

Prej muajsh Katari, Egjipti dhe SHBA përpiqen të negociojnë një armëpushim në Rripin e Gazës dhe të arrijnë lirimin e pengjeve që mbahen nga Hamasi. Por në muajt e fundit konflikti në Lindjen e Afërt është ashpërsuar më tej. Sipas zyrës së kryeministrit izraelit, Netanjahu është shprehur i gatshëm të vazhdojnë negociatat javën që fillon.

Lufta në Gaza u nis me pretekstin e shpërthimeve të sulmit të Hamasit në zonat izraelite dhe një festivali popi më 7 tetor. Si reagim Izraeli filloi luftë gjenocidale në Rripin e Gazës, që kritikohet gjithnjë e më shumë në shkallë ndërkombëtare. Sipas të dhënave të Ministrisë së Shëndetësisë në zonat palestineze janë vrarë rreth 39.8000 vetë.