Rrëshqitje dheu në Qendër të Shkupit, banorët alarmuan për punime në ditë feste (VIDEO)
Banorët e rrugës “Hristo Smirnenski” në Qendër të Shkupit alarmuan për një kantieri ndërtimi ku, siç thonë ata, sot ka pasur rrëshqitje dheu gjatë aktiviteteve të ndërtimit. Ata informuan se një ekskavator po punonte në kantierin e ndërtimit, edhe pse sot është ditë jopune, dhe po shkaktonte zhurmë, ndërsa rreth orës 13:30, banorët ndjenë një dridhje që, siç thonë ata, u shkaktua nga rrëshqitja e dheut të tokës ku po kryhen punime, transmeton Portalb.mk.
Një shtyllë ndriçimi ka rënë mbi një automjet të parkuar. Sipas dëshmive të qytetarëve, rrëshqitja e dheut ka ndodhur në momentin kur një ekskavator po punonte brenda gërmimit për themele, duke marrë para edhe një pjesë të rrugës anësore.
“Rrëshqitje e re dheu në një kantier ndërtimi, në rrugën “Hristo Smirnenski” në Qendër, e cila të çon në bulevardin “Mitropoliti Teodosij Gologanov”. Ndjehej sikur kishte tërmet të madh, ndërsa ekskavatori po punonte edhe pse është ditë jo pune. Banorët janë të shqetësuar. Prishja ndodhi rreth orës 13:20, dhe më pas disa njerëz erdhën dhe mohuan se sot kishte punime në kantierin e ndërtimit, megjithëse e gjithë lagjja e pa punëtorin duke dalë nga vrima. Ai madje po tërhiqte kabllot nga shtylla”, thonë banorët.
Në video, mund të shihet se si ekskavatori është brenda kantierit të ndërtimit dhe punon në mënyrë aktive gjatë një dite jo pune, shton ajo.
Lidhur me rastin ka reaguar edhe Ministria e Punëve të Brendshme (MPB), e cila konfirmoi dinamikën e ngjarjes:
„Sot (25.05.2026) rreth orës 13:30 në SPB Shkup është denoncuar se në rrugën ‘Hristo Smirnenski’, gjatë kryerjes së gërmimeve për ndërtimin e një objekti nga një makineri pune (ekskavator) e angazhuar nga kompania investitore, ka ndodhur një rrëshqitje dheu. Ekskavatori ka përfunduar i mbuluar nga dheu, por personi që po e drejtonte ka arritur të dalë me kohë. Si pasojë e kësaj shembjeje janë dëmtuar pjesë të trotuarit dhe të rrugës, si dhe është rrëzuar një shtyllë e cila ka dëmtuar një automjet të tipit „Dacia Sandero“ në pronësi të personit me iniciale E.M. Në vendin e ngjarjes kanë dalë menjëherë forcat e policisë, ndërsa janë njoftuar edhe Qendra për Menaxhim me Krizat (QMK), EVN-ja dhe institucionet e tjera kompetente për të marrë masat e nevojshme për sanimin e rrezikut dhe zbardhjen e plotë të rastit.” thuhet në kumtesë.
Iniciativa “Në mbrojtje të Bunjakovecit” gjithashtu raportoi për këtë çështje, duke treguar se ka ndodhur shembje e tokës nën asfalt pranë kantierit të ri të ndërtimit, i cili ishte duke funksionuar gjithashtu në festë zyrtare.
“E gjithë infrastruktura është e dëmtuar – kabllot e energjisë, telekomunikacioni… A janë rrugët dhe trotuaret në bulevard dhe rrugë gjithashtu në rrezik – gjykojeni vetë”, thanë ata, dhe në të njëjtën kohë publikuan video.