RMV, një person i verbër është diskriminuar nga ana e një komisioni profesional, i është zvogëluar ndihma

Një burrë plotësisht i verbër, gjendja shëndetësore e të cilit u përcaktua mjekësisht si e përhershme dhe e pandryshueshme, është thirrur përsëri për një kontroll mjekësor për të vlerësuar nevojën e tij për ndihmë dhe kujdes. Përveç kësaj, ndihma që ai kishte marrë më parë në një shumë më të madhe, iu zvogëlua. Ngjarja është regjistruar në Qytetin e Shkupit, njofton Portalb.mk.

Sipas rastit të shqyrtuar, personi e gëzonte që nga viti 2018 të drejtën për ndihmë dhe kujdes në shkallë më të madhe. Pas një kontrolli më 27 janar 2026, komisioni i ekspertëve e uli këtë të drejtë dhe caktoi një kontroll të ri pas 12 muajsh.

Komisioni për diskriminim vlerësoi se nuk kishte prova për ndonjë përmirësim apo ndryshim në gjendjen shëndetësore që do ta justifikonte uljen e ndihmës. Në dokumentacionin mjekësor, verbëria në të dy sytë përcaktohet si gjendje e përhershme.

Për këtë arsye, Komisioni rekomandoi rivlerësimin e nevojës për ndihmë dhe kujdes, duke marrë parasysh dispozitat ligjore për personat plotësisht të verbër. Gjithashtu, duhet të rishikohet nevoja për kontrolle të përsëritura, duke pasur parasysh natyrën e pandryshueshme të gjendjes së personit.

Institucioni ka 30 ditë për të zbatuar rekomandimet, ndërsa në rast të moszbatimit, Komisioni paralajmëron mundësinë e nisjes së procedurës për kundërvajtje.