RMV, janë paguar 318 milionë denarë për projekte kulturore pa kritere të përcaktuara qartë
Ministria e Kulturës vitin e kaluar ka paguar gjithsej 318 milionë denarë, gjegjësisht mbi 5 milionë euro për projekte të ndryshme kulturore, pa kritere të përcaktuara qartë për shpërndarje, të cilat mund të ndikojnë në zgjedhjen subjektive të projekteve, thuhet në raportin e ri të publikuar nga Enti Shtetëror i Revizionit (EShR), transmeton Portalb.mk.
Revizorët kanë konstatuar mangësi në ndarjen e mjeteve për projekte kulturore, të cilat realizohen me konkurs vjetor në përputhje me Ligjin për kulturë.
Për shkak të parregullsive dhe mospërputhjeve të konstatuara, ESHR ka dhënë opinion jo të favorshëm për realitetin dhe objektivitetin e pasqyrave financiare, si dhe opinion me rezervë për pajtueshmërinë me rregulloren ligjore.
“Është konstatuar se nuk ka kualifikime të qarta për anëtarët e komisionit, prioritetet në konkurse shpeshherë janë të përgjithshme dhe nuk bazohen në politika afatgjata, si dhe kriteret e vlerësimit të projekteve nuk janë të përcaktuara në mënyrë strikte, gjë që krijon hapësirë për subjektivizëm, emërim jokompetent të anëtarëve dhe kategorizim jo korrekt i projekteve”, thuhet në raportin e Revizionit.
Këto mangësi, thotë ESHR-ja, çuan në ndarje të pamjaftueshme cilësore të mjeteve, dhe komisionet shënuan projekte pa udhëzime specifike dhe pa kritere për notim negativ të autorëve të pasuksesshëm.
“Pavarësisht prioritetit për reforma në këtë fushë, propozimi për një ligj të ri, i cili mund të përmirësojë sistemin, ende nuk është miratuar”, shtuan revizorët.
Në kuadër të Konkursit Vjetor për financimin e projekteve me interes nacional në kulturë për vitin 2023, Ministria e Kulturës mbështeti 74 nga 185 aplikacione për projekte ndërdisiplinore, që paraqet 40 përqind të propozimeve, me pagesë totale prej 22,185 mijë denarë.
Përkundër faktit se aktiviteti ndërdisiplinor nuk është formalisht i përcaktuar në Ligjin për Kulturë, Ministria ka vazhduar të financojë projekte jashtë kategorive të përcaktuara, gjë që nuk është në përputhje me Ligjin për kulturën.
“Për shkak të marrëveshjeve financiare që lejojnë financimin e më shumë se dy projekteve nga një person juridik, si dhe mungesës së dokumentacionit dhe vlerësimit të plotë të ndryshimeve të marrëveshjeve, kërcënohet transparenca dhe drejtësia në ndarjen e mjeteve. Këto mangësi hapin hapësirë për parregullsi dhe favorizim të projekteve të caktuara në aktivitete ndërdisiplinore”, thuhet në raportin e ESHR-së.
Dobësi janë konstatuar edhe në ndarjen e fondeve për projekte me interes kombëtar, veçanërisht në bashkëpunimin kulturor ndërkombëtar, që sipas auditorëve tregon për mungesë transparence. Një pjesë e mjeteve të disbursuara për projekte nuk është dhënë me tenderë të rregullt, dhe disa subjekte juridike kanë marrë mbështetje mbi limitin prej katër projekteve, gjë që shkel respektimin e kushteve të përcaktuara.
“Ministria edhe pse ka miratuar Udhëzimet e financimit, ajo nuk ofron udhëzime mjaft të sakta, gjë që krijon një situatë të pafavorshme për pjesëmarrësit e tjerë në tenderë”, thonë auditorët.
Auditimi ka konstatuar dobësi në regjistrimin e fondeve dhe dokumentacionit të projektit për objektet kapitale në periudhën 2012-2023.
Në lidhje me realizimin e prioriteteve për zhvillimin dhe promovimin e kulturës, ESHR-ja deklaroi se Strategjia Kombëtare për Zhvillimin e Kulturës e miratuar së fundi nga Kuvendi përfshin periudhën 2018-2022, duke i lënë aktivitetet për vitin 2023 pa udhëzime të qarta. Ministria nuk ka miratuar plan vjetor as për periudhën paraprake dhe as për vitin 2023, gjë që është vërejtur edhe në raportet e mëparshme të auditimit.
Kujtojmë se paraprakisht, Enti Shtetëror i Revizionit ka gjetur parregullsi të shumta në Korridoret 8 dhe 10d. E para që ka rënë në sy të revizorëve është fakti se për Korridorin 8 dhe 10d nuk ka projekt bazë dhe specifikim teknik, që do të thotë se projektimi do të bëhet gjatë ndërtimit. Edhe pse vlera indikative e Komiteti të transportit ishte parashikuar 585 milion euro, në marrëveshjen e arritur vlera e projekti është 1 miliardë e 319 milion euro.