Nëntë fëmijë të infektuar me salmonelë në tri shkolla në Komunën e Karposhit
Nëntë fëmijë nga tri shkollat fillore në Komunën e Karposhit janë të infektuar me salmonelë. Sipas informacioneve të marra nga “360 gradë”, pesë nga fëmijët e infektuar janë nga shkolla “Vllado Tasevski”, tre nga “Vojdan Çernodrinski” dhe një nga “Jan Amos Komenski”. Fëmijët janë nga klasa e parë deri në të katërtën, të cilët mëngjesin dhe drekëne hanin në shkollë, transmeton Portalb.mk.
Shërbimet komunale nga Karposhi thonë se në ShF “Vojdan Çernodrinski” nga 180 nxënës që hanë mëngjes dhe drekë në kuzhinën e shkollës, vetëm tre nxënës nga Qendra e Shëndetit Publik kanë konfirmim se kanë salmonelë.
“Në shkollën ‘Jan Amos Komenius’ nga 350 nxënës që hanë në kuzhinën e shkollës (mëngjes dhe drekë), vetëm një nxënës është konfirmuar me salmonelë”, thuhet në informacionin nga Komuna e Karposhit.
Në këto dy shkolla, shërbimet komunale thonë se bëhet fjalë për nxënës të klasës së parë.
Numri më i madh i rasteve të konfirmuara është në shkollën “Vllado Tasevski”, edhe atë te pesë nxënës nga klasa e parë deri në 4, nga 350 fëmijë që marrin ushqim në shkollë.
“Të premten, në menynë ditore, fëmijët kanë ngrënë bukë pa vezë për mëngjes, ndërsa për drekë kanë ngrënë spinaq pa mish, me qumësht. Gjatë ditës së djeshme dhe sot janë marrë tampone nga të gjitha sipërfaqet e punës në të gjitha shkollat dhe të gjithë të punësuarit”, shton Komuna e Karposhit.
Nga atje thonë se kompania që furnizon me ushqime të gjitha shkollat fillore në Karposh, ka kërkuar vetë kontroll të jashtëzakonshëm.
“Deri në marrjen e rezultateve do të mbyllen kuzhinat në këto tri shkolla, si dhe kuzhina në ‘Dimo Haxhi Dimov’ ku nuk ka raste të regjistruara, por ndodhet depoja nga e cila furnizohen shkollat e tjera. Rezultatet priten më së voni deri të shtunën”, thonë nga Komuna e Karposhit.
Sipas informacioneve nga Qendra për Shëndet Publik (QSHP), ku janë pranuar raportet për fëmijët e infektuar, thonë se tashmë janë duke u bërë inspektime të jashtëzakonshme nëpër shkolla.
“Për mbikëqyrjen e situatës sanitare, higjienike dhe epidemiologjike në objekte, zbulimin e burimit të infeksionit dhe thyerjen e zinxhirit të transmetimit të sëmundjes infektive, ekipet e Inspektoriatit Shtetëror Sanitar dhe Shëndetësor në bashkëpunim me përfaqësues nga ISHP Instituti i Shëndetit Publik, Qendra për Shëndet Publik dhe Agjencia e Ushqimit dhe Veterinarisë kryejnë inspektime të jashtëzakonshme në objekte”, shtoi QShP.
Raportimet për fëmijë të infektuar me salmonelë kanë arritur në Qendrën e Shëndetit Publik nga mjekët amë.