Ministria e Shëndetësisë në RMV u bëri thirrje qytetarëve të raportojnë parregullsitë në lidhje me ndërhyrjet kardiologjike

Ministria e Shëndetësisë informon se të gjithë qytetarët kanë mundësi të raportojnë informacione për parregullsi të mundshme në lidhje me kryerjen e ndërhyrjeve kardiologjike dhe kardiovaskulare, përmes platformës  “Raportoni parregullsi”, e cila është e disponueshme në faqen zyrtare të MSH në këtë LINK, transmeton Portalb.mk.

“Përmes kësaj platforme në faqen e Ministrisë, qytetarët mund të raportojnë edhe informacione për parregullsi të mundshme lidhur me ndërhyrjet kardiologjike. Ministria e Shëndetësisë mbetet e përkushtuar në përmirësimin e sistemit shëndetësor, ndërsa prioriteti ynë është shëndeti dhe siguria e pacientëve”,  theksoi ministri i Shëndetësisë, Azir Aliu.

Raportimi është i besueshëm dhe për çdo raportim veprohet në përputhje me procedurat ligjore.

Kujtojmë se tashmë ka filluar punën komisioni i brendshëm, i përcaktuar për përgatitjen e një analize paraprake të ndërhyrjeve kardiologjike dhe kardiovaskulare në institucionet shëndetësore të vendit. Gjetjet nga kjo analizë e komisionit të brendshëm do ti dorëzohen shumë shpejt komisionit profesional të përbërë nga ekspertë të huaj.

Njëkohësisht, Ministria e Shëndetësisë ka dërguar shkresë në institucionet publike shëndetësore që të dorëzojnë të dhëna për numrin e përgjithshëm të procedurave dhe operacioneve të kryera gjatë periudhës janar 2022 – gusht 2025, për procedurat ndërhyrëse kardiologjike, siç janë koronarografitë dhe stentimet, angiografitë vaskulare si dhe operacionet kardiokirurgjikale/vaskulare.

Veprimet e Ministrisë vijnë pas deklaratës së kirurgut kardiolog Sashko Kedev në një intervistë me Kanal 77, se në disa spitale private kryhen ndërhyrje të panevojshme për fitim, duke përfshirë stentime dhe operacione të panevojshme. Ai nuk përmendi asnjë spital me emër. Pas deklaratës, spitali privat “Acibadem Sistina” i kërkoi atij të specifikonte se për cilin institucion bëjnë fjalë këto pretendime, duke e paralajmëruar se nëse nuk e bën këtë, do të ngrejë padi për shpifje dhe dëmtim të reputacionit.

• LEXO Ndërhyrjet kardiologjike nën thjerrë, Aliu: Pres rezultate objektive nga analiza e komisionit
• LEXO: Ministri Aliu takoi dr. Kedevin: Spitalet private nga shtatori do të duhet të informojnë MSH-në për ndërhyrjet e kryera
• LEXO: Aliu: Shëndetësia private do të duhet të hapë bazat e të dhënave të pacientëve
• LEXO: Ministria e Shëndetësisë ka formuar komision për mbikëqyrje të ndërhyrjeve kardiologjike në spitalet private dhe publike në RMV