LSDM kërkoi të publikohet raporti për ujin në Gostivar

By T. B. On 14/08/2026 19:23

LSDM-ja kërkoi që Qeveria menjëherë të publikojë të plotë raportin dhe analizat për ujin në Gostivar. Sipas tyre, është e papërgjegjshme dhe joserioze që, pas gjithçkaje që ka ndodhur në Gostivar, qytetarëve t’u kërkohet sërish të besojnë vetëm deklaratat, transmeton Portalb.mk.

“Veçanërisht sepse pushteti vazhdimisht ka dhënë informacione të ndryshme, ndërsa deklaratat e funksionarëve qeveritarë gjatë pesë javëve të fundit kanë qenë të ndryshme dhe kontradiktore. Shtrohet pyetja edhe pse deri më tani asnjëherë nuk është publikuar analiza e plotë e ujit për Gostivarin? Nuk ka dokument. Nuk ka raport. Prandaj LSDM kërkon që Qeveria sot të publikojë raportin e plotë për ujin në Gostivar”, thuhet në reagim.

Nga LSDM theksojnë se për shëndetin e qytetarëve duhet të ekzistojë një dokument, analizë profesionale, përgjegjësi institucionale dhe nënshkrim.

“Cilat janë rezultatet e analizave dhe cila institucion i ka kryer ato? Kush e ka nënshkruar raportin? Kush e ka miratuar përdorimin e ujit dhe kush me nënshkrimin e tij garanton se ai është i sigurt për qytetarët? Pas 5 mijë qytetarëve me probleme shëndetësore dhe pas të gjitha informacioneve kontradiktore nga institucionet, nuk ka më hapësirë për sigurime gojore. Bëhuni të paktën një herë seriozë dhe të përgjegjshëm – publikoni dokumentin”, thonë nga LSDM.

Më herët gjatë ditës,drejtori i Agjencisë së Veterinarisë dhe Ushqimit, Oliver Milanov, tha se pas pranimit të rezultateve të analizave laboratorike të kryera nga Instituti i Shëndetit Publik, Agjencia e Ushqimit dhe Veterinarisë (AUV) njofton se uji nga ujësjellësi i Gostivarit, duke filluar nga sot, është i sigurt për pije dhe mund të përdoret pa kufizime.

“Gjatë gjithë procesit e kemi matur cilësinë e ujit dhe në këtë mënyrë ishte e mundur në vazhdimësi ndjekja e ndotjes së ujit dhe në kohë informimi i institucioneve për të marrë masa. Pas rezultateve të fundit të marra është konstatuar se janë pltoësuar kushtet që uji është i pijshëm”, tha Milanov.

Përndryshe, më 17 korrik, Agjencia e Ushqimit dhe Veterinarisë lëshoi ndalesë për pirjen e ujit në Gostivar pasi u zbuluan pompa që drejtpërdrejt injektonin ujëra të zeza në sistemin e furnizimit me ujë. Inspektorët e AUV-së dolën në terren së bashku me policinë pasi u regjistrua një numër i rritur i qytetarëve me probleme me stomakun.

Disa ditë më vonë, më 20 korrik, drejtoresha e NP “Komunalec” nga Gostivari dhe dy punonjës të tjerë u ndaluan dhe kundër tyre u iniciua hetim për ndotjen e ujit në Gostivar. Ata dyshohen se me lëndë të dëmshme e kanë bërë të papërdorshëm ujin për pije në dhomën e tejmbushjes së sistemit që e furnizon me ujë Komunën e Gostivarit dhe disa fshatra përreth. Sipas hetimit më 25 qershor të dyshuarit kishin urdhëruar punonjësit të vendosnin tre pompa zhytëse në një kanal me ujë sipërfaqësor të ndotur pranë dhomës së tejmbushjes së ujit të pijshëm për ta testuar presionin e ujit.

Agjencia e Ushqimit dhe Veterinarisë mori mostra të ujit, por edhe pse rezultatet e analizave ishin gati Qeveria dhe Prokuroria nuk i publikuan menjëherë. Pas insistimit të gazetarëve Prokuroria Publike i publikoi rezultatet sipas të cilave uji në Gostivar ka qenë jashtëzakonisht i ndotur dhe nuk duhej të përdorej për asnjë qëllim. Në ujë u zbuluan “baktere koliforme 2.419,6 cfu/100 ml, ndërkohë që kufiri maksimal i lejuar është 50 cfu/100 ml, ndërsa në mostrat e marra nga burimi i ujit u konstatua se në ujë ka një numër të rritur të kolonive bakteriale mezofile aerobe dhe prani të baktereve koliforme, ku sipas standardeve duhet të ketë 0 cfu/100 ml, ndërsa në ujë u gjetën 39 cfu/100 ml. Bëhet fjalë për sasi jashtëzakonisht të madhe të fekaleve në ujin e pijshëm.

Dhjetëra banorë të Gostivarit për çdo ditë këkojnë ndihmë mjekësore.