Koalicioni i të vullnetshmëve, manovra ushtarake në Poloni
Stërvitjet e para ushtarake të “koalicionit të të Vullnetshmëve ” në mbështetje të Ukrainës do të zhvillohen këtë vjeshtë në Poloni .
Këtë e njoftoi Kryeministri polak Donald Tusk në Paris, pasi grupi i vendeve u takua ditën e mëparshme në kryeqytetin francez. Tusku përmendi trupat franceze dhe britanike ndër pjesëmarrësit ndërkombëtarë. Forcat e armatosura polake do të veprojnë si pjesëmarrëse dhe si mikpritëse. Këto manovra synojnë të “përgatitin koalicionin për të ofruar garanci konkrete sigurie për Ukrainën, por edhe për rajonin”, tha Tusk-u, sipas agjencisë së lajmeve PAP.
Macron: “Të vendosura dhe të besueshme”
Presidenti francez Emmanuel Macron kishte përmendur për herë të parë stërvitjet e përbashkëta të hënën, pa specifikuar se ku do të zhvilloheshin. Sipas Macronit, ato do të mbaheshin në vendet fqinje të Ukrainës . Qëllimi është të tregohet se ata janë “të vendosur dhe të besueshëm në tokë, në ajër dhe në det”.
Vendimi për krijimin e një force ndërhyrëse shumëkombëshe ishte marrë tashmë në janar. Ajo do të dislokohet kur të bëhet e nevojshme për të siguruar një armëpushim ose një marrëveshje paqeje midis Ukrainës dhe Rusisë. Megjithatë, asnjë marrëveshje e tillë nuk është në horizont, pasi Rusia vazhdon pa ndërprerje luftën e saj agresive kundër Ukrainës.
Ministri polak i Mbrojtjes, Wladyslaw Kosiniak-Kamysz, deklaroi se vendi i tij ishte gjithashtu i gatshëm të mirëpriste një stacionim të përhershëm të trupave franceze dhe britanike. “Nëse marrim përsipër më shumë përgjegjësi për kufirin lindor të NATO-s, atëherë ata që jetojnë larg do të vijnë në Poloni,” tha ai në Varshavë, sipas agjencisë së lajmeve PAP.
Polonia ndan një kufi më shumë se 500 kilometra me Ukrainën. Ky kufi përbën kufirin e jashtëm si të BE-së, ashtu edhe të NATO-s.
Tusku nuk pret paqe së shpejti
Gjermania gjithashtu kishte sinjalizuar mbështetjen e saj për një forcë shumëkombëshe në janar. Në Paris, Kancelari Friedrich Merz i bëri një apel Rusisë: “Mesazhi ynë për Rusinë është si më poshtë: ka ardhur koha të ulet në tryezën e bisedimeve. Ka ardhur koha të pajtohet për një armëpushim. Ka ardhur koha t’i jepet fund kësaj gjakderdhjeje të pakuptimtë në Ukrainë.”
Kryeministri polak Tusk nuk pret që paqja në Ukrainë të arrihet së shpejti.
Ai pret që Rusia, nën Presidentin Vladimir Putin, të zgjasë konfliktin të paktën deri në dimër, tha Tusk në Paris. “Duke marrë parasysh qëndrimin e palëkundur të Rusisë dhe Putinit, duket e pamundur në këtë fazë që të arrihet një armëpushim ose një marrëveshje paqeje në të ardhmen e afërt.”
Për shkak të sulmeve të vazhdueshme të Rusisë ndaj Ukrainës, Gjermania, Franca dhe vende të tjera evropiane kishin vendosur, në takimin e tyre në Paris, të krijojnë një sistem të përbashkët mbrojtjeje raketore me Ukrainën.
Burimi: 