Izraeli intensifikoi bombardimet në mbarë Gazën

Forcat izraelite kanë bombarduar Rafahun dhe zonat e tjera në mbarë Rripin e Gazës dhe janë përfshirë në luftime nga afër me luftëtarët e Hamasit tha ushtria izraelite dhe banorët, transmeton Radio Evropa e Lirë.

Banorët thanë se forcat izraelite duket se po tentojnë të përfundojnë kapjen e Rafahut, qytetit më jugor të Gazës i cili ka qenë në fokus të sulmeve izraelite që nga fillimi i majit.

Tanket izraelite po vazhdojnë të përparojnë në pjesët veriore dhe perëndimore të qytetit, teksa Izraeli deri më tani ka arritur të marrë kontrollin e pjesës lindore, qendrore dhe jugore të Rafahut.

Sulmet e fundit izraelite nga toka, ajri dhe deti, po detyrojnë më shumë banorë që të zhvendosen nga qyteti.

Mbi një milion persona ishin zhvendosur në Rafah për shkak të luftimeve në pjesë të tjera të Gazës dhe ata sërish po detyrohen të zhvendosen.

Zyrtarët shëndetësorë palestinezë thanë se të paktën 12 persona u vranë gjatë sulmeve ajrore izraelite më 21 qershor.

Ndërkaq, ushtria izraelite tha se forcat e saj po kryejnë veprime “precize” në zonën e Rafahut, ku trupat janë përfshirë në luftime nga afër. Ushtria tha se ka lokalizuar tunele që janë përdorur nga radikalët e Hamasit, duke shtuar se veprime ushtarake po kryhen edhe në pjesë të tjera të Gazës.

Lufta në Gazë më 7 tetor. Si pasojë e ofensivës izraelite, në Gazë janë vrarë më shumë se 37.000 persona dhe pothuajse e gjithë popullsia, prej 2.3 milionë banorësh e kësaj enklave, është zhvendosur.