Ismet Guri u ul në bankën e të akuzuarit, por u shty gjyqi për evazionin fiskal
Ish-zëvendësdrejtori i Drejtorisë së të Ardhurave Publike (DAP), Ismet Guri (60), u soll sot në Gjykatën Penale dhe u ul për herë të parë në bankën e të akuzuarit, por gjykimi për evazion fiskal në të cilin ai akuzohet u shty për më 4 tetor. Shtyrja e seancës së sotme ka ardhur për shkak të mosparaqitjes së njërit prej të pandehurve, transmeton Portalb.mk.
Ish-zëvendësdrejtori i DAP-it u përfshi në një rast mashtrimi tatimor ku dyshoheshin 15 persona, mes të cilëve biznesmenë dhe inspektorë të Drejtorisë, të cilët akuzohen për disa krime si bashkim kriminal, mashtrim tatimor dhe pastrim parash.
Sipas Prokurorisë, Guri është përfshirë në një skemë mashtrimi tatimor dhe ka bërë rimbursim të TVSH-së përmes llogarive fiktive prej 840 mijë eurosh dhe me paratë ka blerë hapësirë biznesi.
Të akuzuarit tjerë në këtë rast janë Igor Bllazev, Filip Bllazev, Zoran Trajanovski, Pala Taseva, Dona Damjanovska-Markoviq, Ilija Vaskov, Dani Nestorovski, Jagoda Miteva, Besnik Ademi, Fitim Sulejmani, Faruh Guri dhe personat juridikë “Rinolist” dhe “Ekskluziv kamen”.
Seanca e sotme u shty për shkak të mungesës së të akuzuarit Dani Nestorovski, ndërsa gjyqtarja Sofçe Gavrilova-Efremova kërcënoi me masa të rrepta sigurie nëse të akuzuarit nga liria nuk vijnë përsëri në gjykim.
Guri javën e kaluar është vetëdorëzuar në stacionin policor “Prolet” në Shkup dhe më pas është arrestuar dhe dërguar në burg.
Ndaj tij në fillim të janarit të këtij viti ishte lëshuar një urdhër ndërkombëtar, pasi policia nuk e ka gjetur në adresën ku po vuante arrestin shtëpiak.
Gjykata e kishte liruar Gurin nga paraburgimi dhe e ka zëvendësuar përkohësisht me masën e arrestit shtëpiak për shkak të terapisë së rregullt për problemet shëndetësore që kishte.
Ndryshe, Ismet Guri së bashku me Ejup Alimin, më 14 korrik të vitit të kaluar, nga Gjykata Themelore Penale e Shkupit kanë marrë dënime të kundërligjshme me burgim prej tre vjet e gjashtë muaj, në gjykimin e përsëritur të rastit “Titanik 3” për shkatërrimin e materialit zgjedhor.
Gjykimi i përsëritur erdhi pas aktgjykimit të shkallës së parë, por Gjykata e Apelit në Shkup e prishi këtë vendim dhe e ktheu rastin nga fillimi.
Alimi dhe Guri për “Titanik 3” janë akuzuar në qershor të 2017 për krimin e shkatërrimit të materialit zgjedhor. Ata u akuzuan se në zgjedhjet lokale të vitit 2013 kanë ndryshuar një pjesë të regjistrave të votimit në Çair.
Guri ishte aktivist i shquar i BDI-së, ndërsa pas ndarjes së Izet Mexhitit, iu bashkua Lëvizjes Demokratike