Gjoba për investitorin në Qendër të Shkupit: U konstatuan dëme në rrugë, trotuar, kanalizim dhe ndriçim publik
Shërbimet inspektuese të Komunës Qendër, së bashku me Ministrinë e Brendshme, dolën në terren pas incidentit në bulevardin “Teodosij Gologanov”, pranë Kishës Katolike, ku gjatë aktiviteteve të ndërtimit u dëmtuan sipërfaqe publike dhe infrastruktura, transmeton Portalb.mk.
Komuna Qendër njoftoi se pas inspektimit, u konstatuan dëmtime në rrugë, trotuar, sistem kanalizimesh dhe ndriçim rrugor.
Prandaj, siç informon komuna, ndaj investitorit u vendosën menjëherë dënimet dhe sanksionet më të rrepta ligjore për mosrespektimin e detyrimeve dhe shkaktimin e dëmeve në infrastrukturën publike.
Paralelisht me inspektimin, ekipet e Komunës Qendër siguruan vendndodhjen. U vendosën rripa sigurie dhe shirita paralajmërues me qëllim mbrojtjen e qytetarëve dhe mundësimin e lëvizjes së sigurt pranë zonës së dëmtuar.
“Komuna Qendër nuk do të tolerojë sjellje të pamatur dhe të papërgjegjshme nga investitorët, veçanërisht kur kjo rrezikon sigurinë e qytetarëve dhe dëmton hapësirën publike. Do të merren masa rigoroze për çdo shkelje në përputhje me juridiksionin ligjor”, njoftoi komuna.
Investitori është i detyruar që menjëherë ta sigurojë hapësirën, të marrë masa për mbrojtje dhe rehabilitim, si dhe ta rikthejë plotësisht infrastrukturën e dëmtuar në gjendjen e saj origjinale.
Komuna Qendër thotë se ata mbeten në terren dhe do ta monitorojnë rastin derisa të eliminohen plotësisht pasojat dhe të sigurohet siguria e qytetarëve.
Banorët e rrugës “Hristo Smirnenski” dje dërguan foto dhe video nga vendi i ndërtimit, duke pretenduar se gjatë aktiviteteve të ndërtimit ka ndodhur rrëshqitje e tokës. Sipas tyre, një ekskavator po punonte në vendin e ndërtimit edhe pse ishte ditë jo pune, dhe rreth orës 13:30 ata ndjenë dridhje, të cilën e lidhin me rrëshqitjen e tokës.