Bislimoski: Po bëhen analiza nëse dhe në çfarë mase do të ketë zgjerim të tarifës së lirë ditore të rrymës
Komisioni Rregullator i Energjisë (RKE) është duke analizuar nëse dhe për sa mund të zgjatet periudha e tarifës së lirë ditore të energjisë elektrike. Kryetari i Komisionit Rregullator për Energjetikë (KRRE), Marko Bislimoski, thotë se kompanitë në periudhën e kaluar kanë pasur çmime të ulëta të tarifës së lirë ditore të rrymës dhe atë që kanë ata duhet ta kenë edhe amvisëritë, transmeton Portalb.mk.
“Me futjen e tarifës së lirë ditore nga ora 13:00 deri në orën 15:00, tashmë kemi bërë hapin e parë, por trendet në bursë tregojnë se në këtë periudhë ka çmime jashtëzakonisht të ulëta të energjisë elektrike dhe po bëjmë një analiza serioze për dy-tre vitet e ardhshme për çmimet e energjisë elektrike për çdo orë në disa centrale dhe kur të jemi gati do të themi se kur dhe në çfarë mase do të kemi rritje të tarifës së lirë gjatë ditës”, tha Bislimoski.
Lidhur me çmimin e rrymës që do ta paguajnë amvisëritë nga 1 korriku i këtij viti, Bislimoski thotë se varet nga çmimi me të cilin furnizuesi universal do t’i plotësojë nevojat e energjisë elektrike në tregun e rregulluar, por edhe nga numri i konsumatorëve të vegjël që kanë kaluar nga ai i rregulluar drejt tregut të lirë. Sipas Bislimoskit, ulja e marzhit për transmetimin e energjisë elektrike është pozitive.
Bislimoski shton se KRRE nuk do të pranojë kërkesë për çmimin e rrymës sepse, siç thotë ai, do të konfirmojnë vetëm çmimin e përcaktuar nga furnizuesi universal “EVN Home”.
“Furnizuesi universal do të shpallë tenderin gjatë javës për të siguruar energji elektrike për gjashtë muajt e ardhshëm. Duhet të shohim se çfarë çmimesh do të ofrohen dhe është e sigurt që marzhi nuk do të jetë më 11.5 përqind, por do të jetë 9.9 për qind. Duhet të shohim deri në çfarë mase EMV do të sigurojë sasitë e nevojshme për amvisëritë dhe konsumatorët e vegjël. Këto janë elementet më të rëndësishme për çmimin që do ta paguajnë amvisëritë pas 1 korrikut të këtij viti”, tha Bislimoski sot gjatë pauzës së Forumit të katërt Socio-Mjedisor (SEF) të organizuar nga Fondacioni “Friedrich Ebert”.
Sipas tij, aktualisht është e pasaktë përfshirja e përqindjes së subvencionit në faturat që paguajnë qytetarët.
“Do të ishte e gabuar t’u thuash qytetarëve se ka subvencionim kur çmimi i EMV është 57 euro për megavat orë, dhe ka ditë që çmimet e tregut janë 20 dhe 30 euro për megavat orë. Thjesht, zhvillimet në treg janë të tilla që në pjesën më të madhe, në dy-tre muajt e fundit, çmimi është nga 60 deri në 70 euro për megavat-orë. Prandaj, në këtë periudhë nuk ka nevojë të shpallen subvencionet, sepse këtu diku është çmimi i tregut”, tha Bislimoski.
Bislimoski thotë se ka një trend serioz të kalimit të konsumatorëve të vegjël nga tregu i rregulluar në atë të lirë të energjisë elektrike dhe shtoi se në nivel vjetor do të ketë nga 150 deri në 200 milionë kilovat orë më pak konsum në tregun e rregulluar.
“Harxhimet e konsumatorëve të vegjël që kalojnë në tregun e lirë ulen nga 20 deri në 30 përqind dhe në pjesën më të madhe furnitorët u ofrojnë një çmim fiks më të ulët se ai në tregun e rregulluar. Është një proces i mirë që duhet të vazhdojë”, shton kryetari i KRRE-së.
Sipas Bislimoskit, përfitimet nga ndërtimi i termocentraleve fotovoltaike tashmë kanë arritur te kompanitë dhe ato kanë çmime jashtëzakonisht të favorshme të energjisë elektrike gjatë ditës. Kjo, siç thotë ai, tani duhet të kalojë edhe në amvisëri.
“Po i dërgojmë sinjal ‘EVN Home’ dhe EMV që shumicën e blerjeve ta bëjnë gjatë ditës kur çmimet janë jashtëzakonisht të ulëta. Kjo do të jetë mirë për EMV-në, sepse në ato periudha nuk do të ketë nevojë për humbje të burimeve ujore që mund të ruhen për një periudhë kur rryma mund të shitet me çmim më të lartë ose për dimër”, shtoi Bislimoski.
Kujtojmë se, më 1 dhjetor, filloi tarifa e lirë e rrymës në periudhën prej orës 13 deri në 15. Prej atëherë, amvisëritë kanë tarifë të lirë të rrymës nga ora 13 deri në 15 dhe nga ora 22 deri në 7 çdo ditë, si dhe të dielën tërë ditën.