BDI nuk e plotësoi premtimin parazgjedhor, i la shkollat fillore të Tetovës pa salla sportive
Premtimi parazgjedhor i vitit 2020 i Bashkimit Demokratik për Integrim (BDI) për ndërtimin e tetë sallave sportive për shkollat fillore në Tetovë nuk është realizuar. Nga tetë sallat është ndërtuar vetëm një, raporton Portalb.mk.
Në programin zgjedhor 2020-2024 të zgjedhjeve të fundit parlamentare me të cilin garoi BDI, te pjesa e projekteve kapitale në arsim përmendet ndërtimi i tetë sallave sportive në shkollat fillore të Tetovës.
Sipas programit sallat sportive do fillonin të ndërtoheshin në vitin 2020 dhe do të përfundonin në vitin 2024 për këto shkolla: “Bratstvo Migjeni”, “Andrea Saveski Kikish”, “Kirili dhe Metodi”, “Liria”, “Naim Frashëri”, “Istikball”, “Rilindja” në Sellcë dhe “Gjergj Kastrioti” në Xhepçisht.
![Burimi: Printscreen nga Programi zgjedhor 2020-2024 i BDI-së](https://portalb.mk/wp-content/uploads/2024/03/Shkollat-3.png.pagespeed.ce.O4SS9FTwHx.png)
![Burimi: Printscreen nga Programi zgjedhor 2020-2024 i BDI-së](https://portalb.mk/wp-content/uploads/2024/03/Shkollat-4.png.pagespeed.ce.InclOzUjMZ.png)
![Burimi: Printscreen nga Programi zgjedhor 2020-2024 i BDI-së](https://portalb.mk/wp-content/uploads/2024/03/Schools-e1711110162368.png)
Sot, katër vite më vonë në terren nuk janë realizuar shtatë nga këto salla sportive.
Sallë sportive është ndërtuar vetëm në shkollën “Andrea Saveski Kikish”, ku shumica e nxënësve janë maqedonas.
![Salla e Sportit në shkollën fillore "Andreja Saveski Kikish" në Tetovë. Foto: Fisnik Xhelili/Portalb.mk](https://portalb.mk/wp-content/uploads/2024/03/Foto-18.png)
Portalb.mk kërkoi nga BDI se pse nuk janë realizuar të njëjtat, por nga atje nuk na u përgjigjën.
Kërkuam sqarim edhe nga Ministria e Arsimit dhe Shkencës, por as nga ky institucion nuk u përgjigjën në pyetjet gazetareske.
Mungesën e sallave sportive nxënësit dhe arsimtarët e këtyre shkollave e ndjejnë më tepër gjatë stinës së vjeshtës dhe dimrit kur ora e edukatës fizike duhet të zhvillohet brenda.