Aktakuza për krime ndaj 6 ish-gardianëve për keqtrajtim të të burgosurve shqiptarë në Luftën e Kosovës

By F. C. On 03/07/2026 19:58

Veshje të ushtarëve të UÇK-së nga Lufta e Kosovës. Foto nga Faton Curri - Portalb.mk

Prokuroria Speciale ka njoftuar se ka ngritur dy aktakuza në mungesë për veprën penale “Krime lufte kundër popullsisë civile”, raporton Koha.net. Në rastin e parë, Prokuroria Speciale ka ngritur aktakuzë ndaj J.J. dhe A.S..

“Sipas aktakuzës, të pandehurit, ish-gardianë të Burgut të Prishtinës dhe paraleles së tij në Lipjan, gjatë viteve 1998-1999 kanë keqtrajtuar të burgosurit shqiptarë, duke i torturuar në mënyrë çnjerëzore me mjete të ndryshme, si shkopinj gome, shufra metalike, shqelma dhe grushte deri në alivanosje. Po ashtu, ata i kanë kanosur seriozisht me vrasje”, thuhet në njoftim.

Kurse në rastin e dytë është ngritur aktakuzë ndaj katër të pandehurave: L.S., D.L., S.A., B.S..

“Të pandehurat akuzohen se, në cilësinë e gardianeve të Burgut të Prishtinës – paralelja për gra në Lipjan, gjatë periudhës së luftës 1998-1999, në bashkëkryerje me tashmë të akuzuarën N.C., i kanë keqtrajtuar në mënyrë sistematike të burgosurat shqiptare, duke i torturuar në mënyrë çnjerëzore dhe duke u shkaktuar lëndime trupore e dhunë psikike”, thuhet në njoftim.