Mitsotakis: Shkupi duhet të kuptojë se nuk mund të luajë me Athinën për çështjen e emrit
Më pyesni se çfarë po ndodh, unë ju them se nuk mund të vazhdojmë kështu. Kryeministri i Maqedonisë së Veriut, nëse insiston në këtë retorikë që nga momenti i marrjes së detyrës, do ta gjejë veten në një pozitë shumë të pakëndshme kur të takohemi në Samitin e NATO-s, tha kryeministri grek Kyriakos Mitsotakis në një intervistë për radio Real FM, për qëndrimin e mandatarit për formimin e Qeverisë, Hristijan Mickoski, në lidhje me përdorimin e emrit Maqedoni, raportoi korrespondenti i MIA-s nga Athina.
Mitsotakis shpjegoi se Marrëveshja e Prespës jep një emër të vetëm për përdorim të përgjithshëm, jo një formulë të dyfishtë dhe përsëriti edhe një herë se mosmarrëveshja mund të krijojë probleme në marrëdhëniet me Greqinë, me NATO-n dhe BE-në, por edhe se çështja do të ngrihet në Samiti i NATO-s në gjysmën e parë të korrikut.
“Sigurisht që do ta ngre dhe mendoj se do të kem shumë aleatë në këtë përpjekje. Shkupi duhet të kuptojë se nuk mund të luajë me Athinën për një çështje të tillë, sepse nëse vendi do të përpiqej për një emër të dyfishtë, çështja do të ishte mbyllur shumë vite më parë. Shkupi ka hyrë në NATO pikërisht përmes Marrëveshjes, e cila ka problemet e veta, por ka dhënë një emër për të gjithë dhe nëse kjo sfidohet, le ta dijë Maqedonia e Veriut se do të ketë probleme të mëdha, jo vetëm në marrëdhëniet e saj bilaterale me Greqinë, por edhe në marrëdhëniet e saj si në NATO ashtu edhe me Bashkimin Evropian, në të cilin ka ambicie të bëhet anëtare në një moment”, tha Mitsotakis.
Greqia dhe Maqedonia e Veriut kanë rritur tensionet midis tyre, të cilat erdhën pasi gjatë betimit që bëri presidentja e re e vendit, Gordana Siljanovska-Davkova, përmendi vetëm emrin Maqedoni në vend të emrit kushtetues të shtetit, Maqedoni e Veriut.
Vazhdës së reagimeve ndërkombëtare iu bashkëngjitën edhe SHBA-ja dhe Franca, të cilat i bënë thirrje qeverisë së re të Maqedonisë së Veriut që të mbetet e fokusuar në rrugën drejt Bashkimit Evropian dhe të respektojë detyrimet e saj ndërkombëtare.