VMRO-ja e ka sjellë Maqedoninë në një nivel me Somalinë, tha LSDM pasi SHBA pezulloi përpunimin e vizave
Lidhja Socialdemokrate e Maqedonisë (LSDM) lëshoi mbrëmë reagim pasi Departamenti i Shtetit njoftoi se kishte pezulluar përpunimin e vizave të emigrantëve për qytetarët e 75 vendeve, përfshirë Maqedoninë, dhe akuzoi VMRO-DPMNE-në në pushtet se në këtë mënyrë e ka futur vendin në një nivel me Somalinë, transmeton Portalb.mk.
“Mediat kryesore amerikane dhe botërore raportuan se Maqedonia është përfshirë në grupin me Somalinë, Sirinë, Ganën, Ruandën, Butanin, Nigerinë, Rusinë, për të cilat është pezulluar përpunimi i vizave”, thuhet në reagimin e LSDM-së.
Administrata e Presidentit të SHBA-së, Donald Trump, ka pezulluar përpunimin e vizave të emigrantëve për qytetarët e 75 vendeve, raporton Fox News, duke cituar një dokument nga Departamenti i Shtetit.
Lista e publikuar e vendeve të prekura të raportuara nga mediat lokale përfshin, siç shkruhet, Maqedoninë, së bashku me vende nga Evropa, Azia, Afrika dhe Amerika Latine. Midis tyre janë Rusia, Irani, Afganistani, Brazili dhe Nigeria.
Vendet e Ballkanit në listë, përveç vendit tonë, janë Shqipëria, Bosnja dhe Hercegovina, Mali i Zi dhe Kosova.