Turqia nesër voton, mbahen zgjedhjet presidenciale dhe parlamentare
Sfida të paprecedentë që mund t’i japin fund qeverisjes dy dekadash të Rexhep Tajip Erdogan presin presidentin turk në zgjedhjet presidenciale dhe parlamentare që do të mbahen nesër në Turqi, transmeton Portalb.mk.
Votuesit do të vendosin për fatin e demokracisë turke më pak se tre muaj pas tërmetit të 6 shkurtit që vrau më shumë se 50,000 njerëz dhe zhvendosi më shumë se 5.9 milionë qytetarë nga Turqia jugore dhe Siria veriore.
CNN shkruan se zgjedhjet po zhvillohen në kushtet e një krize të rëndë ekonomike dhe erozionit demokratik nën qeverisjen e Erdoganit.
Analistët parashikojnë pjesëmarrje rekord votuesish dhe një garë të ngushtë midis Erdoganit dhe kandidatit kryesor të opozitës Kemal Kaliçdaroglu – lideri i Partisë Popullore Republikane dhe kandidati presidencial për bllokun gjashtëpartiak Aleanca e Kombit.
Demografia e vendit gjithashtu pritet të luajë rol në zgjedhje. Shumica e provincave të goditura nga tërmeti në shkurt ishin bastionet e Erdoganit dhe Partisë së tij për Drejtësi dhe Zhvillim. Megjithatë, të paktën një milion votues nga zonat e prekura nga tërmeti pritet të mos votojnë për shkak të zhvendosjes.
BBC raporton se Kaliçdaroglu ka epërsi të lehtë në sondazhe dhe se mbështetësit e tij shpresojnë se ai mund të fitojë zgjedhjet e nesërme, duke fituar 50 për qind të votave, në vend që të përballet me balotazh dy javë më vonë.
Në garë për presidencën e Turqisë mbeten tre kandidatë – përveç Erdoganit dhe Kaliçdaroglut, për presidencën po lufton edhe Sinan Ogan nga Unioni i djathtë i të parëve.
BBC raportoi se Muharrem Inxhe u tërhoq nga gara presidenciale të enjten, duke u ankuar se ai kishte qenë objektiv i sulmeve në mediat sociale përmes videove të rreme seksuale që “manipulonin elektoratin”.
Kandidati kryesor i opozitës fajësoi Rusinë për videot dhe Kremlini mohoi çdo përfshirje në zgjedhjet e Turqisë.
Mediat raportojnë se partia e Erdoganit ka ende mbështetje të fortë, e cila vjen kryesisht nga partia nacionaliste MHP dhe grupe të tjera më të vogla në Aleancën e tij Popullore.
Më shumë se 64 milionë njerëz pritet të votojnë në zgjedhjet në Turqi të dielën. Që të fitojë njëri prej kandidatëve është e nevojshme të sigurohet më shumë se gjysma e votave. Ndryshe, zgjedhjet presidenciale do të vazhdojnë me raundin e dytë më 28 maj mes dy kandidatëve që kanë marrë më shumë vota.