Trump premton fitore kundër Iranit, por nuk jep një afat kohor për t’i dhënë fund luftës
Presidenti i SHBA-së, Donald Trump, tha në një fjalim televiziv të mërkurën në mbrëmje se ushtria amerikane pothuajse i kishte arritur qëllimet e saj në Iran, por nuk ofroi një afat kohor të qartë për t’i dhënë fund luftës njëmujore dhe u zotua ta bombardonte vendin përsëri, transmeton Reuters.
Përballë një publiku amerikan të kujdesshëm ndaj luftës, vlerësimeve në rënie të miratimit dhe presionit nga disa aleatë për të përshkruar qëllimet e tij të luftës në terma më të saktë dhe konsistent, Trump tha se SHBA-të kishin shkatërruar forcat detare dhe ajrore të Iranit, dhe kishin paralizuar programet e tij të raketave balistike dhe bërthamore.
Por ai refuzoi të paraqiste një plan konkret për të përfunduar luftën, tani në javën e saj të pestë, përtej thënies se SHBA-të do ta përfundonin punën “shumë shpejt”.
“Ne i kemi të gjitha kartat”, tha Trump nga Shtëpia e Bardhë në fjalimin e tij në kohë prajm që kur SHBA-të dhe Izraeli nisën luftën më 28 shkurt. “Ata nuk kanë asnjë”.
Ai i anashkaloi disa çështje të mëdha të pazgjidhura, siç është statusi i uraniumit të pasuruar të Iranit dhe qasja përmes Ngushticës së Hormuzit, një kanal për furnizimet globale me naftë, të cilin Irani e ka mbyllur në mënyrë efektive.
Ngushtica, tha ai, do të hapet “natyrshëm” sapo të mbarojë lufta.
Fjalimi 19-minutësh i Trump nuk solli shumë gjëra të reja dhe ofroi pak siguri për amerikanët dhe aleatët e SHBA-së, të cilët po ndiejnë dhimbje në rritje në pompën e benzinës dhe padurim në rritje me luftën.
Aksionet ranë, dollari u forcua dhe nafta u rrit menjëherë pas komenteve të Trump, duke reflektuar ndjenjën e përhapur se konflikti ka të ngjarë të zvarritet për ca kohë.
Presidenti dhe këshilltarët e tij kanë ofruar shpjegime dhe afate kohore të ndryshueshme për konfliktin, si dhe atë që do të kërkojnë nga Irani që ai të përfundojë.
Ndërsa e portretizoi Iranin si të neutralizuar ushtarakisht, Trump tha gjithashtu të mërkurën në mbrëmje se SHBA-të do ta godisnin fort kombin për dy ose tre javë të tjera.
Nëse udhëheqësit e rinj të vendit nuk negociojnë në mënyrë të kënaqshme, tha ai, SHBA-të do të fillojnë të sulmojnë prodhimin e energjisë elektrike dhe infrastrukturën e naftës së vendit.
Ndërsa Trump fliste, sirenat ajrore u dëgjuan në të gjithë Dohan dhe Tel Avivin, duke ilustruar se si Republika Islamike është ende në gjendje të shkaktojë kaos në të gjithë Lindjen e Mesme, pavarësisht humbjeve të mëdha.
“Do t’i godasim jashtëzakonisht fort gjatë dy deri në tre javët e ardhshme”, tha Trump. “Do t’i kthejmë në Epokën e Gurit, atje kur përkasin”.
“Ndërkohë, diskutimet janë duke vazhduar,” shtoi ai. “Megjithatë, nëse gjatë kësaj periudhe kohore nuk arrihet asnjë marrëveshje, ne i kemi sytë te objektivat kryesorë.”
Një ditë më parë, Trump u tha gazetarëve se Teherani nuk kishte nevojë të bënte marrëveshje si parakusht që konflikti të përfundonte.
Ndërsa presidenti të mërkurën pranoi shkurtimisht shqetësimet në rritje midis amerikanëve se lufta po e bën benzinën të papërballueshme, ai këmbënguli se çmimet së shpejti do të uleshin dhe se rritjet ishin kryesisht faji i Iranit.
Ai shtoi se vendet që marrin pjesën më të madhe të furnizimit të tyre me naftë nga rajoni i Gjirit duhet të marrin përsipër hapjen e ngushticës. Britania, Franca dhe aleatë të tjerë të SHBA-së kanë thënë se janë të gatshëm të ndihmojnë për ta mbajtur ngushticën të hapur, por vetëm pasi të kenë pushuar armiqësitë.
“Ata mund ta bëjnë këtë lehtësisht,” tha Trump. “Ne do të jemi të dobishëm, por ata duhet të marrin përsipër mbrojtjen e naftës nga e cila varen kaq shumë,” tha ai.
Trump ka shprehur zemërim që aleatët e NATO-s nuk janë ofruar të ndihmojnë në hapjen e ngushticës, madje duke kërcënuar të tërhiqet nga aleanca 76-vjeçare.