Spitali kryesor i Gazës mezi funksionon pas mësymjeve izraelite dhe 21 muajve luftë

Spitali Shifa ishte dikur shtyllë e sistemit shëndetësor në Rripin e Gazës. Tani, pas 21 muajsh luftë dhe dy mësymjeve të mëdha izraelite, ai mezi po funksionon. Korridoret e tij janë plot me njerëz të plagosur nga sulmet ajrore izraelite, ndërsa morgu i tij i mbushur me kufoma, shkruan Radio Evropa e Lirë.

Mjekët dhe infermierët kryejnë operacione në kushte të mjerueshme, shpesh nën dritën e telefonave mobilë. Pacientët që presin jashtë për dializë qëndrojnë mes rrënojave të një reparti të bombarduar të spitalit.

Izraeli kreu dy mësymje të mëdha ndaj Shifas dhe ka sulmuar disa qendra të tjera mjekësore, duke akuzuar militantët e Hamasit – grup i shpallur terrorist nga Shtetet e Bashkuara të Amerikës dhe Bashkimi Evropian – se strehohen brenda tyre.

Stafi mjekësor ka mohuar akuzat, por pjesëtarë të Hamasit mund të shihen shpesh brenda objekteve të tilla dhe kanë kufizuar qasjen e publikut në disa pjesë të tyre.

Spitalet mund të humbin statusin e vendit të mbrojtur sipas të drejtës ndërkombëtare, nëse ato përdoren për qëllime ushtarake.

Izraeli thotë se bën maksimumin për të kursyer civilët, duke evakuuar objekte të tilla dhe duke iu dërguar atyre ndihma.

Por, mjekët thonë se mësymjet kanë rrezikuar pacientët dhe kanë shkatërruar sistemin shëndetësor, teksa viktimat po shtohen nga lufta e vazhdueshme.

Izraeli mësyu Shifan për herë të parë në nëntorin e vitit 2023, disa javë pasi sulmi i 7 tetorit i Hamasit në Izrael e nxiti luftën.