Sot në RMV përfundon viti shkollor, nxënësit shkojnë në pushime verore
Për nxënësit e shkollave fillore dhe të mesme, viti shkollor 2025/2026 përfundon sot. Nga nesër deri më 31 gusht, ata janë në pushime verore, ndërsa për maturantët dhe gjysmë-maturantët do të pasojë provimi shtetëror i maturës dhe regjistrimi në shkollat e mesme, transmeton Portalb.mk.
Për më shumë se 14.500 maturantë, mësimi përfundoi më 15 maj, ndërsa nesër, më 11 qershor, ata që janë regjistruar për provimin shtetëror të maturës do ta japin provimin e detyrueshëm të jashtëm në gjuhën e tyre amtare, pra maqedonisht, shqip, turqisht ose serbisht.
Më 12 qershor, kandidatët për provimet shtetërore të maturës profesionale dhe shtetërore artistike do t’i japin provimet, pasi më parë, më 6 qershor, maturantët e kishin dhënë tashmë pjesën e parë të lëndës zgjedhore eksterne. Nga gjithsej 14.587 nxënës të regjistruar për provimin e maturës shtetërore, shumica, përkatësisht 12.184, u regjistruan për provimin e maturës shtetërore, 2.276 nxënës do të japin provimin shtetëror të maturës profesionale, ndërsa 127 janë regjistruar për provimin shtetëror të maturës artistike.
Regjistrimi në arsimin e mesëm për nxënësit gjysmë-maturantë fillon këtë muaj. Regjistrimi do të bëhet elektronikisht përmes portalit Uslugi.gov.mk me një hyrje të veçantë për nxënësit nga llogaritë e tyre të përdoruesit në schools.mk, dhe më pas ata do të dorëzojnë dokumentacionin e nevojshëm në shkollat ku po aplikojnë. Dy regjistrime elektronike janë planifikuar për qershor.
Sipas Konkursit të Ministrisë së Arsimit dhe Shkencës, regjistrimi i parë do të fillojë më 12 qershor në mesnatë dhe do të zgjasë deri në orën 23:59 më 15 qershor, ndërsa regjistrimi i dytë në afatin e qershorit do të jetë më 23 qershor. Për ata që nuk do të mund të regjistrohen në qershor, do të ketë afatregjistrimi më 20 gusht.
Konkursi i Ministrisë së Arsimit dhe Shkencës parashikon mbi 25.000 vende të lira në të 109 shkollat e mesme publike në vend. Hapësira më e madhe këtë vit është lënë në arsimin profesional, ku ka më shumë se 17.000 vende të lira, i ndjekur nga arsimi i mesëm me 6.000 vende të lira, ndërsa ka 570 vende të lira në arsimin artistik.