SHBA-të u kthyen 81 miliard dollarë kompanive, Gjykata Supreme i shpalli tarifat e Trumpit të paligjshme
Qeveria amerikane ka shlyer tashmë dhjetëra miliarda dollarë në tarifat që kishte vendosur përpara se Gjykata e Lartë e SHBA-së të shpallte pjesën më të madhe të taksës të paligjshme, treguan të dhënat e buxhetit të publikuara të hënën, transmeton Euronews.
Tarifat, ose taksat mbi importin e mallrave, kanë qenë një nga shtyllat kryesore të politikës ekonomike të Donald Trump që kur ai u kthye në Shtëpinë e Bardhë vitin e kaluar.
Në shkurt, Gjykata e Lartë rrëzoi një pjesë të madhe të tarifave shtesë që Trump kishte futur, duke e detyruar qeverinë t’u rimbursojë kompanitë që i paguanin ato, shkruan Guardian.
Sipas të dhënave të buxhetit, Shtetet e Bashkuara paguan një total prej 81 miliardë dollarësh në rimbursime tarifash gjatë vitit aktual fiskal, i cili filloi në tetor 2025. Në të njëjtën periudhë të vitit të kaluar, kjo shumë ishte vetëm pesë miliardë dollarë.
Një zyrtar i Departamentit të Thesarit të SHBA-së tha se pothuajse e gjithë rritja e pagesave ishte rezultat i vendimit të Gjykatës Supreme, me pjesën më të madhe të rimbursimeve të bëra gjatë majit dhe qershorit.
Trump i paraqiti tarifat si një zgjidhje të përgjithshme për ekonominë amerikane, duke pretenduar se ato do të sillnin prodhimin përsëri në SHBA, do të siguronin marrëveshje tregtare më të favorshme dhe do të zvogëlonin deficitin e buxhetit federal.
Megjithatë, deficiti buxhetor, i cili u ul pak vitin e kaluar falë të ardhurave doganore, po rritet përsëri. Në nëntë muajt e parë të vitit fiskal, ai arriti në 1.367 trilion dollarë, që përfaqëson një rritje prej dy përqind.
Në të njëjtën kohë, Shtetet e Bashkuara shpenzuan më shumë se një trilion dollarë vetëm për pagesat e interesit të borxhit kombëtar , që është 14 përqind më shumë se një vit më parë, ndërsa shpenzimet ushtarake u rritën me pesë përqind për shkak të luftës në Lindjen e Mesme.
Tarifa e përkohshme universale prej 10 përqind e vendosur nga administrata amerikane do të skadojë më 24 korrik, por Shtëpia e Bardhë po përgatit tashmë masa të reja tarifore për shkak të asaj që ajo thotë se është zbatim i pamjaftueshëm i rregulloreve kundër punës së detyruar dhe mbikapacitet në industri.
Propozimi i fundit mund të godasë partnerët kryesorë tregtarë, përfshirë Mbretërinë e Bashkuar, Japoninë, Indinë, Tajvanin dhe Kinën, dhe do t’i lejonte Trump të anashkalonte kufizimet e vendosura më parë nga gjykatat mbi politikat e tij proteksioniste. Normat e reja doganore pritet të jenë midis 10 dhe 12.5 përqind.
Shtetet e Bashkuara kanë kërcënuar gjithashtu të vendosin tarifa të reja prej 25 përqind për mallrat nga Brazili.
Muajin e kaluar, Trump kërcënoi gjithashtu të vendoste tarifa 100 për qind për vendet evropiane që vendosin taksa mbi kompanitë më të mëdha amerikane të teknologjisë.
Mbretëria e Bashkuar aplikon një taksë mbi shërbimet dixhitale prej dy përqind, e cila zbatohet për rrjetet kryesore sociale, motorët e kërkimit në internet dhe tregjet online. Kjo taksë, e cila paguhet nga kompani të tilla si Apple, Google dhe Amazon, solli më shumë se 800 milionë paund ose mbi 1 miliard dollarë të ardhura gjatë vitit fiskal 2024/25, sipas Thesarit të Mbretërisë së Bashkuar.
Franca, Spanja dhe Italia aplikojnë një taksë mbi shërbimet dixhitale prej tre përqind për kompanitë e mëdha që operojnë në tregjet e tyre, ndërsa disa vende të tjera të Bashkimit Evropian kanë prezantuar ose propozuar masa të ngjashme.
Presidenti amerikan tha se tarifa e tij do të kishte përparësi mbi të gjitha marrëveshjet tregtare me SHBA-në, “pavarësisht nëse ato kanë hyrë në fuqi, janë nënshkruar apo janë ende të planifikuara”.
Në një postim në rrjetin social Truth Social, Trump shkroi: “Një numër vendesh evropiane po shqyrtojnë zbatimin e menjëhershëm të një takse mbi shërbimet dixhitale për kompanitë amerikane. Disa nga këto vende janë shumë afër marrjes së një vendimi të tillë. Le të shërbejë kjo deklaratë si një paralajmërim se çdo vend që vendos një taksë të tillë do të përballet menjëherë me një tarifë prej 100 përqind për të gjitha mallrat e eksportuara në Shtetet e Bashkuara të Amerikës.”
“Kjo tarifë do të ketë përparësi mbi të gjitha marrëveshjet tregtare me atë vend, pavarësisht nëse ato janë në fuqi, të nënshkruara apo jo. Nëse ata vazhdojnë me atë politikë, një tarifë prej 100 përqind do të vendoset menjëherë”, shtoi presidenti i SHBA-së.