Rrahën për vdekje një person në Kavadar, Prokuroria ngriti hetim ndaj tre të dyshuarve
Prokuroria Themelore Publike e Kavadarit ka hapur hetim kundër tre personave të dyshuar për rrahjen për vdekje të një burri 43-vjeçar para një kazinoje në Kavadar. Të dyshuarit po ndiqen penalisht për veprën – lëndim i rëndë trupor me pasoja fatale, por Prokuroria njofton gjithashtu riklasifikim të mundshëm të krimit në vrasje, transmeton Portalb.mk.
“Gjatë hetimit, do të sigurohen të gjitha provat dhe do të kryhet ekzaminim psikiatrik i të dyshuarve, kështu që nëse përcaktohet se ata kanë pasur vetëdije dhe qëllim për të privuar nga jeta palën e dëmtuar, krimi mund të riklasifikohet si vrasje”, tha Prokuroria.
Dy nga të dyshuarit janë 27 vjeç dhe njëri është 35 vjeç. Sipas Prokurorisë, më 27 gusht rreth orës 5 të mëngjesit, ata patën një grindje verbale me (tani të ndjerin) në një kazino në Kavadar, pas së cilës dolën jashtë dhe filluan ta rrihnin.
“Ata e sulmuan fizikisht dhe e goditën me grushte dhe shqelma në të gjithë trupin dhe kokën. I dëmtuari u përpoq të hynte në kazino, por humbi ndjenjat. Me goditjet i shkaktuan disa lëndime të rënda trupore, nga të cilat ai vdiq”, tha Prokuroria.
Për shkak të rrezikut të arratisjes, prokurori publik i paraqiti propozim gjyqtarit të procedurës paraprake të Gjykatës Themelore në Kavadar për të përcaktuar një masë paraburgimi për tre të dyshuarit.
“Këtë e tregon edhe sjellja e tyre menjëherë pas ngjarjes, sepse ata u larguan nga vendi i ngjarjes dhe nuk u paraqitën vetë në polici. Në vend të kësaj, ata shkuan së bashku në banesën e njërit prej të dyshuarve. Për këto arsye, prokurori publik vlerësoi se paraburgimi ishte i nevojshëm për zhvillimin e qetë të procedurës dhe sigurimin e të gjitha provave”, tha Prokuroria Publike në Kavadar.
Dje, Ministria e Brendshme raportoi se një burrë 43-vjeçar vdiq pas një përleshjeje para një kazinoje në Kavadar. Policia ndaloi tre persona nën dyshimin për përfshirje.