RMV, studentët në protestë para MASh-it: Kërkojmë ndryshime! (Galeri)
Qindra studentë sot para Ministrisë së Arsimit dhe Shkencës protestuan duke u shprehur se po kërkojnë ndryshime, transmeton Portalb.mk.
Qëllimi i protestës është të theksohet nevoja për një efikasitet më të madh të institucionit, të shprehet revolta e studentëve për pagesën në kohë të bursave të zgjatura, vonesat e vauçerëve të transportit dhe vonesat me pagesat pas përfundimit të marrëveshjeve për pagesën retroaktive të bursave.
Studentët në protestë vunë në dukje edhe problemet me ushqimin e subvencionuar të studentëve dhe mosrespektimin e afateve të përcaktuara dhe koordinimin mes departamenteve në institucion.
Protesta u organizua nga Parlamenti Studentor Universitar i UKM-së, ndërsa ka marrë mbështetje nga kuvendet tjera studentore nga shteti, si dhe nga disa organizata studentore dhe lëvizje joformale.
Ministria e Arsimit dhe Shkencës njoftoi menjëherë para fillimit të protestës se nga muaji janar janë paguar të gjitha bursat shkollore dhe studentore të përfituesve ekzistues për vitin akademik 2023-2024. Për përdoruesit e rinj, megjithatë, pagesa do të bëhet gjatë javës.
“Të rinjtë të jenë të qetë, të gjitha mjetet që u takojnë do të paguhen në tërësi”, thonë nga Ministria.
Nga aty shtojnë se kjo Qeveri nuk ka praktikë të heqjes së të drejtave, por përkundrazi, avokon për përmirësimin e standardeve të studentëve dhe nxënësve edhe në atë drejtim.
“Janë futur kategoritë e reja të bursave, dhe shumat mujore të atyre ekzistuese janë rritur, për kategori të caktuara, me mbi 80%. U prezantua vakt i subvencionuar i studentëve dhe shuma e tij u rrit më tej me kërkesë të studentëve. Ne kemi prezantuar gjithashtu një sërë masash kundër krizës për të mbështetur procesin arsimor të të rinjve dhe për të mbuluar një pjesë të shpenzimeve. Së shpejti do të nisë rikonstruksioni me etapa i konvikteve shtetërore të studentëve”, thuhet në njoftim.
Ministria e Arsimit thotë se mbeten në komunikim me organizatat që përfaqësojnë studentët dhe së bashku do të marrin vendimet që i prekin në të ardhmen.
Edhe pse u ishte premtuar se, mbështetja financiare për transportin ndërurban për studentët për muajin janar do të paguhet më së voni deri më 02 shkurt të këtij viti, studentët ende nuk kanë marrë mjetet e premtuara.
Studentët këtë përkrahje prej 1200 denarë e marrin nga dhjetori dhe duhet t’u paguhet në baza mujore deri në qershor. Po ashtu, studentët nuk kanë marrë asnjë këst të bursave për vitin aktual shkollor, edhe studentët që janë përfitues ekzistues ose të rinj të bursave studentore janë planifikuar të marrin bursë gjatë nëntë muajve, pra nga tetori deri në qershor. Bursat, janë 6.050 denarë, me përjashtim të bursave për programet studimore në kimi, fizikë dhe matematikë, si dhe ato për shkencat bujqësore, veterinare dhe pyjore, të cilat janë 18.000 denarë në muaj.