RMV, procedurë disiplinore për dy policë të cilët rrejshëm pohuan se automjeti “Porsche” është zyrtar

By F. C. On 05/04/2025 13:12

Vetura e parkuar keq, foto nga video e Ljubo Obocki në Facebook

Nga ana e Departamentit për kontroll të brendshëm, hetime kriminalistike dhe standarde profesionale në MPB janë bërë kontrolle pas publikimit të një video incizimi në rrjetin social Fejsbuk më 4 prill 2025. Në video shihet se si një grup qytetarësh kërkojnë nga një polic i cili operon me automjetin special “karrotreci” për ta larguar automjetin “Porsche Cayenne” më targa të Shkupit, pasi është parkuar në një shteg biçikletash, raporton MIA.

Siç bën të ditur MPB, nëpunës policorë kanë kryer kontroll në DSPS Shkup dhe kanë konstatuar se nga ana e tyre është vepruar pas kundërvajtjes për parkim të gabuar nga drejtuesi i automjetit “Porsche Cayenne”.

Pas mbikëqyrjes së dokumentacionit zyrtar është konstatuar se nëpunësi i policisë S.N. nga DSPS Shkup, më 22.03.2025 ka vepruar sipas Urdhrit për kryerjen e veprimtarisë nr. 3626 nga 21.03.2025 për parkim të parregullt. Nga ana e shtetasit S.N., në numrin e telefonit 192 është raportuar se në rr. “Orce Nikollov”, në afërsi të lokalit, automjeti “Porshe kaen” është parkuar në mënyrë të parregullt.

Nëpunësi policor S.N., me automjetin special “karotreci” dhe dy punonjës nga NP për Parkingje publike të Komunës Qendër, kanë shkuar në vendin e ngjarjes, ku është gjetur vetura dhe një grup i revoltuar qytetarësh kanë kërkuar që të shmanget makina. Në vendin e ngjarjes, nga një lokal kanë dalë dy persona të cilët janë legjitimuar si nëpunës policor dhe kanë thënë se automjeti është zyrtar. Nëpunësi i policisë S.N. ka urdhëruar që menjëherë të largohet makina dhe të parkohet në vend të përshtatshëm, pas së cilës është futur në kabinën e “karotrecit” për të kontrolluar nëse automjeti është vërtet zyrtar.

“Pasi ka konstatuar se automjeti nuk është zyrtar dhe se ende nuk është mënjanuar, punonjësve të NP Parkingjet publike u është dhënë urdhër që ta largojnë automjetin. Aty nga punonjësi i policisë H.Gj. është bërë procesverbali për kryerje të kundërvajtjes në komunikacion sipas nenit. 63 paragrafi 6 të LSKRr si dhe urdhërpagesë për kundërvajtje ku thuhet se kryerës i kundërvajtjes është S.K. (76) nga Shkupi. Pronari i makinës është M.T. (48) nga Shkupi”, thuhet në kumtesën e MPB-së.

Nga MPB shtojnë se me këta nëpunës policor është zhvilluar bisedë zyrtare gjatë së cilës është konstatuar se kanë kryer shkelje të rëndë të rendit dhe disiplinës së punës dhe se ndaj tyre do të iniciohet propozim për konstatimin e përgjegjësisë disiplinore.

Ndryshe, Ministria e Punëve të Brendshme dje (4 prill) ka njoftuar se është sanksionuar një vozitës, i cili ka parkuar në mënyrë të parregullt automjetin në lagjen e Dibranëve në Shkup. Nga aty kanë njoftuar se kontrolli i brendshëm pranë MPB-së po e heton rastin.

LEXO: Shkup, reagimet në rrjete sociale alarmuan autoritetet që të gjobitet shoferi, i cili e ka parkuar automjetin në mënyrë të paligjshme