Posti manipulon që partitë opozitare dhe mediat në Ukrainë janë të ndaluara
Nuk mund të thuhet se partitë opozitare në Ukrainë janë të ndaluara sepse janë opozitare, por ka parti, aktiviteti i të cilave është i ndaluar për shkak të dyshimit se janë të kontrolluara ose të lidhura me një vend që ka kryer një pushtim ushtarak të Ukrainës. Ngrirja e veprimtarisë së tyre politike do të zgjasë për aq kohë sa të zgjasë pushtimi ushtarak, shkruan Vërtetmatësi.
Ne analizojmë një postim në rrjetin social Facebook që thotë:
Në Ukrainë, partitë opozitare u ndaluan, mediat opozitare u çaktivizuan. Ju e morët të mirëqenë gjithë këtë, në emër të luftimit të rusëve. Jemi tashmë në një moment kur presidenti i Gjeorgjisë refuzon të largohet nga detyra dhe në Rumani anuluan raundin e parë të zgjedhjeve. Ju e dini se ku po shkon kjo.
Publikimi pretendon se partitë opozitare janë ndaluar në Ukrainë, por këtu harron të përmendë se këto parti opozitare janë të lidhura me Rusinë dhe se arsyeja pse u ndaluan ishte se Rusia kreu një pushtim ushtarak agresiv të Ukrainës, me viktima të shumta, duke përfshirë civilët.
Sipas Guardian, partitë politike nuk u ndaluan sepse janë opozitare, por sepse kanë lidhje me Rusinë, e cila në një situatë pushtimi ushtarak përbën një kërcënim për sigurinë kombëtare. Partitë politike nuk u ndaluan në kohë paqeje, por në kohë lufte, kur siguria kombëtare është qëllimi kryesor i Ukrainës. Këshilli Kombëtar i Sigurisë dhe Mbrojtjes së Ukrainës u mblodh dhe vendosi të ndalojë aktivitetet politike të këtyre partive. Shumica e tyre ishin të vegjël, por njëra prej tyre, e quajtur Platforma e Opozitës për Jetën, kishte 44 vende parlamentare në parlamentin 450 anëtarësh të Ukrainës.
Veprimtaritë e atyre politikanëve synojnë përçarje dhe përplasje dhe nuk do të kenë sukses, por do të marrin një përgjigje të ashpër. Kjo është arsyeja pse Këshilli Kombëtar i Sigurisë dhe Mbrojtjes vendosi, duke pasur parasysh luftën totale të nisur nga Rusia dhe lidhjet politike që kanë shumë struktura politike me këtë vend, të pezullojë aktivitetet e tyre gjatë ligjit ushtarak, tha Zelensky në mars të vitit 2022.
Platforma opozitare për Jetën, partia më e madhe opozitare e Ukrainës, udhëhiqet nga Viktor Medvedchuk, një oligark pro-Moskoës me lidhje të ngushta me Vladimir Putin. Autoritetet ukrainase në vitin 2021 akuzuan Medvedchuk, mikun e vjetër të Putinit (Putin besohet të jetë kumbari i vajzës së Medvedchuk) për tradhti dhe e vendosën atë në arrest shtëpiak, një veprim që zemëroi Kremlinin. Ukraina më pas raportoi se Medvedchuk ishte arratisur nga arresti shtëpiak një ditë pasi Rusia filloi pushtimin e saj ushtarak, vetëm për t’u ri-arrestuar dhe përfundimisht shkëmbyer me rreth 215 ushtarë ukrainas të kapur nga Rusia gjatë agresionit të saj kundër Ukrainës.
Në listën e partive të ndaluara përfshihet edhe partia Nashi, e udhëhequr nga Yevhen Murayev, si dhe parti më të vogla që nuk kishin përfaqësues në parlament. Para fillimit të luftës, inteligjenca britanike pretendoi se Rusia synonte të instalonte Murayev në krye të një Qeverie të kontrolluar nga Kremlini në Kiev, gjë që Murayev e mohoi me forcë.
Pra, nuk mund të thuhet se partitë opozitare në Ukrainë janë të ndaluara sepse janë opozitare, por këto parti janë të ndaluara për shkak të dyshimit se janë të kontrolluara ose të lidhura me një vend që ka kryer një pushtim ushtarak të Ukrainës. Ngrirja e veprimtarisë së tyre politike është për kohëzgjatjen e pushtimit ushtarak.
Për sa i përket pretendimit në njoftimin se mediat opozitare në Ukrainë ishin të ndaluara, duhet theksuar se në vitin 2021, me kërkesë të presidentit ukrainas Volodymyr Zelensky, u zbatuan sanksione ndaj tre televizioneve: News One, Channel 112 dhe ZIK, të cilat i përkisnin Taras Kozak, i cili besohet të jetë një front i Viktor Medvedchuk. Sanksionet u zbatuan në përputhje me Ligjin e vitit 2014, i cili lejon qytetarët ukrainas të sanksionohen nëse kërcënojnë interesat kombëtare të Ukrainës. Në këto kanale transmetohej propaganda e Kremlinit.
Mediat masive në Ukrainë janë në pronësi të shtetit dhe në pronësi të korporatave që varen nga reklamat, abonimet dhe shitjet. Kushtetuta e Ukrainës garanton lirinë e fjalës. Sistemi mediatik ukrainas është në proces tranzicioni. Siç raporton BBC, me fillimin e pushtimit ushtarak, mediat në Ukrainë morën anën patriotike.
BBC thekson se një numër i madh mediash ekzistojnë në Ukrainë, nga ku rezulton se nuk është e vërtetë që mediat opozitare “janë të ndaluara”.
Sa i përket proceseve zgjedhore në Gjeorgji dhe Rumani, për të cilat komentohej edhe postimi, Vërtetmatësi shkroi një analizë më të gjerë të temës, duke vënë në dukje ndikimin rus që hodhi hije mbi zgjedhjet në këto vende. Analizën mund ta lexoni këtu.
Nga të gjitha faktet e mësipërme, mund të konkludojmë se postimi është manipulues, lë jashtë shumë informacione të rëndësishme, të nevojshme për të informuar siç duhet publikun për temat dhe ngjarjet që trajton, gjë që, nga ana tjetër, çon në krijimin e përfundimeve krejtësisht të gabuara, prandaj e gjykojmë si një postim që i mungon konteksti.
