Në Tetovë u hap ekspozita e dy piktorëve, “Mbresa Verore” e Began Dearit dhe “Barrierat laramane” e Bilgaip Koçishtës

Mbrëmë në Galerinë e Arteve në Tetovë u hap ekspozita e dy piktorëve, Began Deari me titull “Mbresa Verore”, dhe Bilgaip Koçishta ose siç e njohin të gjithi Biges me “Barrierat laramane”, njofton Portalb.mk.

Mure si pengesa, bllokime, kufizime, rezistenca, pengesa, parandalim… Të gjitha këto janë sinonime të barrierave për të cilat flet ekspozita e mbrëmshme.

Në këtë ekspozitë, kam paraqitur diku 10-11 punime ku konkretisht bëhet fjalë për barrierat autoreferenciale, ku secili njeri i ka gjatë jetës së vetë, e cila është edhe ideja e kësaj ekspozite, tha Bige për Portalb.mk.

“Këtë rast e kam konkretisht për barrierat autoreferenciale, ku secili njeri i ka gjatë jetës së vet, pastaj i shëndrrova në piktura ku është edhe mënyra më e mirë për ta shpreh një përvojë të tillë,” tha Bilgaip Koçishta- Bige.

Piktori Began Deari për Portalb.mk tha se në këtë ekspozitë, ka prezentuar 12 punime, të cilat janë të punuara në teknikën akril në pëlhurë.

“Mbresa Verore” është një cikël që e zhvilloj gjatë karieres time, mirëpo  pesë vitet e fundit kanë qenë më me shumë punë, dhe mbrëmë i kam prezentuar punimet e pesë viteve të fundit” tha ai.

Për të gjithë artëdashësit, ekspozita do të jetë e hapur për shtatë ditë me radhë.