Lidhja Demokratike mori njoftim për t’u larguar nga hapësirat shtetërore ku ndodhet selia e partisë
Lidhja Demokratike, parti e larguar së fundmi nga koalicioni qeverisës, është njoftuar se do të duhet të largohet nga hapësira ku ndodhet selia e partisë. Hapësira të cilën kjo parti e përdor për gati 16 vite ishte në pronësi të shtetit dhe për të i paguante në mënyrë të rregullt qiranë Shoqërisë Aksionare për administrimin e hapësirës shtetërore të biznesit. Partia opozitare dje ka marrë njoftim se për shkak të vëllimit të shtuar të punës, për të cilin kërkohet një numër më i madh i punëtorëve të punësuar në ShA për menaxhimin e objekteve shtetërore afariste – Shkup, është dashur që LD të fillojë përgatitjet për kthimin e lokalit afarist në posedim të Shoqërisë Aksionare, transmeton DW.
“Konsiderojeni si prioritet”
Në njoftimin e marrë, thuhej se hapësira e biznesit në shfrytëzim të Lidhjes Demokratike me Marrëveshje për qira dt.27.9. 2007, tash e tutje do të përdoret për nevojat e punëtorëve të SHA për menaxhim të hapësirës afariste në pronësi shtetërore – Shkup, pasi hapësira aktuale e shfrytëzuar prej tyre ishte shumë e vogël në raport me nevojat reale.
“Njoftimin konsiderojeni si prioritet”, theksohej në shkresën e nënshkruar nga drejtori, nga radhët e BDI-së. Në njoftim nuk ishte theksuar ndonjë afat konkret.
Sipas raportit të fundit të punës për vitin 2021 të publikuar në ueb-faqen e këtij institucioni, kishte 82 punonjës, por për shkak të pensionimit të 7 personave, deri në fund të atij viti kishte 75 të punësuar. Nuk ka informacion nëse dhe sa është rritur ky numër deri më sot. Institucioni është përgjegjës për investimet dhe mirëmbajtjen e vazhdueshme të hapësirës afariste shtetërore, përmirësimin e kushteve për shfrytëzimin e tyre, përcaktimin e shumës së qirasë, lidhjen e marrëveshjeve të qirasë, shitjen e hapësirës afariste në pronësi shtetërore dhe mbajtjen e evidencës së vetme të hapësirës afariste në pronën shtetërore, e cila me këtë menaxhon ShA.
“Përkundër shumë hapsirave tjera…”
Meqenëse institucioni menaxhon një numër të madh të njësive të hapësirës së lirë afariste në disa qytete të vendit, veçanërisht në Shkup, lideri i LD-së, Pavle Trajanov, dyshon në argumentin që Shoqëria Aksionare e ka deklaruar në raport.
“Nuk jam i bindur se kjo shoqëri aksionare, e cila menaxhon një hapësirë afariste me sipërfaqe të madhe katrore, ka nevojë pikërisht për këtë hapësirë që shfrytëzohet nga Lidhja Demokratike”, thotë Trajanov.
“Nuk dua të besoj se ka prapavijë politike kërkesa për dëbimin e Lidhjes Demokratike nga ambientet që përdor që nga viti 2007 dhe në përputhje me kontratën shlyen rregullisht detyrimet financiare. Përndryshe, para se partia të vendosej në këto ambiente, ato ishin rrënuar, për këtë arsye u shpenzuan mjete të mëdha për rregullimin e tyre, ndërsa premtimet për kompensim nuk u zbatuan kurrë. Për shfrytëzimin e hapësirës kemi aplikuar me shpallje publike dhe shuma e tarifës së qirasë është përcaktuar në përputhje me çmimin e përcaktuar nga Shoqëria Aksionare për menaxhimin e hapësirës shtetërore afariste”, sqaron Trajanov.
Ai bën të ditur se partia do të shfrytëzojë të gjitha mundësitë ligjore që të mund të shfrytëzojë pa ndërprerje hapësirën e biznesit.
Kryesia dhe Këshilli Qendror i Lidhjes Demokratike morën një vendim në mes të shkurtit që partia të mos mbështesë rindërtimin e Qeverisë dhe të largohet nga shumica parlamentare. Vendimi për të ndërmarrë një hap të tillë, siç tha Trajanov, është dështim në përmbushjen e qëllimeve programore të përcaktuara dhe të dakorduara me LSDM-në para zgjedhjeve të vitit 2020. Partia njoftoi së fundmi se ka vendosur të mos propozojë përfaqësuesin e saj në grupin e punës për ndryshimet kushtetuese.