I është vënë flaka automjetit të Gjorgji Galetanovskit, LSDM dënon aktin dhe kërkon që MPB ta sqarojë rastin

By N. D. On 09/09/2025 11:51

Zjarrfikësit. Foto nga Teuta Buçi - Portalb.mk

Një BMW, në pronësi të Gjorgji Galetanovskit, pjestar i LSDM-së në Shkup, u dogj mbrëmë. Ministria e Punëve të Brendshme (MPB) thotë se automjeti ishte parkuar në rrugën Ivan Kozarov në lagjen Kisella Voda të Shkupit. Nga BMW-ja e djegur ishin përfshirë edhe dy automjete të tjera me targa të Shkupit, një Opel në pronësi të E. K. (30) dhe një Ford në pronësi të A. M. (47), transmeton Portalb.mk.

MPB thotë se nuk ka pasur të lënduar në zjarr dhe se ai është shuar menjëherë nga brigada e zjarrfikësve të Shkupit.

“Një ekip inspektimi nga SPB Shkup kreu inspektim dhe po merren masa për sqarimin e rastit”, thotë MPB.

Galetanovski, në një postim në profilin e tij në Facebook, konfirmoi lajmin se ishte makina e tij që u dogj.

“Po, automjeti im është djegur plotësisht. Nuk jam grindur me askënd, as nuk më ka kërcënuar askush. Respekt zjarrfikësve që mbërritën pas tre minutash dhe flakët nuk u përhapën në shtëpi”, shkruan Galetanovski.

Ai i bën thirrje Ministrisë së Brendshme dhe ministrit Pançe Toshkovski që ta gjejnë autorin sa më shpejt të jetë e mundur.

“Jo për shkak të humbjes financiare, por për shkak të jetës paqësore në Shkup dhe në të gjithë vendin e të gjithë qytetarëve. Ekziston gjithashtu një ‘qytet i sigurt’ dhe kamera përreth, le të shpresojmë për rivendosje të qetësisë”, shton Galetanovski.

Pas djegies së automjetit të Galetanovskit, LSDM lëshoi një deklaratë, duke thënë se ishte akt kriminal duke kërkuar që Ministria e Brendshme ta sqarojë menjëherë rastin.

“LSDM dënon ashpër aktin kriminal dhe djegien e automjetit të kryetarit të Organizatës së Qytetit, Gjorgji Galetanovski. Me ardhjen në pushtet të VMRO-DPMNE-së, siguria e qytetarëve është kërcënuar seriozisht. Në vend që të merret me mënyrën se si njerëz të afërt me VMRO-DPMNE-në po marrin tendera milionëshe, Ministria e Brendshme më në fund duhet të bëjë diçka. Ne kërkojmë që Ministria e Brendshme dhe të gjitha institucionet kompetente të veprojnë menjëherë, ta zbardhin plotësisht rastin dhe t’i mbajnë përgjegjës autorët”, thuhet në deklaratën e LSDM-së.